निःशुल्क मुटुरोग शिविरमा एक हजार बढी लाभान्वित

 

म्याग्दी २० चैत । म्याग्दी सदरमुकाम बेनीमा आयोजित निःशुल्क मुटु परीक्षण तथा उपचार शिविरबाट एक हजार बढी सर्वसाधारण लाभान्वित बनेका छन् । जिल्ला समन्वय समिति म्याग्दीसहित जिल्लाका ६ वटै स्थानीय तहको संयुक्त आयोजना र शहीद गङ्गालाल राष्ट्रिय हृदय रोग केन्द्र काठमाडौँको प्राविधि सहयोगमा आयोजित शिविरमा एक हजार एक सय पन्ध्र जनाले लाभ लिएको जिल्ला समन्वय समिति म्याग्दीका अधिकृत अमृत सुवेदीले जानकारी दिनुभयो ।

मङ्गलबार र बुधवार सञ्चालन भएको शिविरमा पहिलो दिन ५६५ जना र दोस्रो दिन ५५० जनाले सेवा लिएका हुन् । शिविरमा स्वास्थ्य चेकजाँच गराएकाहरुमध्ये १३ जनालाई थप उपचारको लागि शहीद गङ्गालाल राष्ट्रिय हृदय रोग केन्द्र काठमाडौँका रिफर गरिएको छ । उनीहरुको थप उपचारको लागि यातायात व्यवस्था जयन्ति स्मृति

प्रतिष्ठानले गर्ने भएको छ । शिविरमा स्वास्थ्य चेकजाँच गराएकामध्ये ९ जनामा जन्मजात नै मुटु सम्बन्धि समस्या भएको पुष्टि भएको आयोजकले जनाएको छ ।

म्याग्दी बहुमुखी क्याम्पसमा सञ्चालन भएको शिविरमा म्याग्दी र पर्वतको जलजला गाउँपालिकाका मुटु रोगीहरू लाभान्वित भएका छन् । शिविरमा मुटुरोग विशेषज्ञबाट मुटुको परीक्षण तथा परार्मश, सुगर, इसिजी, ईको तथा रक्त परीक्षण गरिएको शहीद गङ्गालाल राष्ट्रिय हृदय रोग केन्द्र काठमाडौँका निर्देशक डा. रबी मल्लले जानकारी दिनुभयो । शिविरमा प्रदेश अस्पताल बेनीले शिविरलाई सफल पार्न स्वाथ्यकर्मीहरू परिचालन गरेको छ ।

शिविरमा म्याग्दी उद्योग वाणिज्य सङ्घ, राखु समाज कल्याण समिति, म्याग्दी जेसीज, नेपाल रेडक्रस सोसाईटी, ओमकुमारी शान्ति कोष र म्याग्दी बहुमुखी क्याम्पसले स्वंयमसेवक परिचालन गरी सहयोग गरेका थिए भने प्रदेश अस्पताल बेनीले समेत स्वास्थ्यकर्मी परिचालन गरेको थियो । जिल्लामा मुटुरोग सम्बन्धी विशेषज्ञ सेवा नभएको अवस्थामा काठमाण्डौका विशेषज्ञ सहितको टोली नै आएर शिविरमा मुटुरोग सम्बन्धी स्वास्थ्य चेकजाँच र उपचार सेवा दिएपछि सर्वसाधारण खुसी भएका छन् ।