२३ औं जेसीजकप फुटबलको उपाधीका लागि बेनी सामुदायिक र केवि एकेडेमि प्रतिस्पर्धा गर्दै

म्याग्दी१३ मङ्सिर ।  म्याग्दी सदरमुकाम बेनीमा जारी २३ औँ अन्तर मा.वि. जेसीजकप फुटवलको उपाधिका लागि बेनी सामुदायिक र केवि एकेडेमि दरबाङबिच फाइनल भिडन्त हुने भएको छ । सेमिफाइनलमा किसानी चन्द्राकुन्ता माविलाई शुन्यका विरुद्ध एक गोल गर्दै बेनी सामुदायिक र लिटल गार्डेन एकेडेमिलाई पेनाल्टी सुटआउटमा एकका विरुद्ध चार गोल गर्दै केवि एकेडेमि फाइनल प्रवेश गरेका हुन् ।

२३ औँ जेसीजकपमा बेनी सामुदायिकले न्यू वेष्ट पोइन्ट, जनप्रिय मावि र बेनी बोडिङलाई पराजित गर्दै सेमिफाइनल पुगेको थियो भने केवि एकेडेमिले गलेश्वर मावि, माउण्ट एभरेष्टलाई पराजित गर्दै सेमिफाइनल यात्रा तय गरेको थियो । शनिवार बेनीको खुलामञ्चमा दिउँसो साढे ११ बजेबाट सुरु हुने फाइनल खेलको तयारी पुरा भएको म्याग्दी जेसीजले जनाएको छ । फाइनलमा पुगेका दुबै विद्यालयले यस अघि जेसीजकप फुटवलमा उपाधी चुमेका छैनन् ।
बेनी सामुदायिक २२ औँ जेसीजकपमा र केवि एकेडेमि १७ औँ जेसीजकपमा उपबिजेता बनेका थिए । शनिवार विहान आयोजित प्रिम्याच प्रेस कन्फ्रेन्समा दुबै विद्यालयका खेल शिक्षक , टिप व्यवस्थापक र टिम क्याप्टेनहरुले यस पटकको उपाधी आफ्नो पक्षमा पर्ने दावि गरेका छन् । दुबै विद्यालयले अनुशासित पूर्वक खेल प्रतिस्पर्धा गर्ने प्रतिवद्धता समेत जनाएका छन् । विभिन्न १९ विद्यालयले सहभागिता जनाएको प्रतियोगितामा प्रथम हुनेले रनिङ शिल्डसहित ट्रफी, मेडल, प्रमाणपत्र सहित नगद रु ५५ हजार पाँच सय ५५ र उपबिजेताले ट्रफि, मेडल र प्रमाणपत्र सहित नगद रु ३५ हजार पाँच सय ३५ पुरस्कार प्राप्त गर्ने प्रयोगिताका मुल संयोजक एवं म्याग्दी जेसीजका कोषाध्यक्ष नवीन पौडेलले जानकारी दिनुभयो ।
प्रतियोगितामा उत्कृष्ट खेलाडी, सर्वाधिक गोलकर्ता, उत्कृष्ट गोलरक्षक, उत्कृष्ट स्ट्राइकर, उत्कृष्ट डिफेन्डर, उत्कृष्ट मिडफिल्डर, राइजीङ प्लेयर, उत्कृष्ट प्रशिक्षकलाई नगदरु २ हजार पाँच सयसहित ट्रफिद्धारा पुरस्कृत गरिनेछ । त्यस्तै, अनुसासित टिम र सेमिफाइनल पुग्ने दुई टिमलाई नगद रु ५ हजार सहित सहित सम्मान गरिने प्रतियोगिताका संयोजक पौडेलले जानकारी दिनुभयो ।