रौतहटमा कठ्याङ्ग्रिएर १३ को मृत्यु, जनजीवन कष्टकर

रौतहट । रौतहटको कटहरिया नगरपालिका वडा नम्वर १ हर्षाहा टोलका ५५ बर्षीय बैधनाथ साह कलवारको ‘ब्रेन हेम्रेज’ बाट ज्यान गएको छ । भारत बिहार घोडा शहनस्थित आफन्तको घरबाट बिहानै फर्किने क्रममा शीतलहरबाट प्रभावित कलवार उच्च रक्तचाप भएपछि अचेत भएर लडेका थिए । सडकमै लडेका उनको शिवनगरस्थित उपचारको क्रममा मंगलबार राति निधन भएको मृतकका भाई गणेश साह कलवारले बताए ।

–चिकित्सकले गणेशलाई बताएअनुसार कलवारको अत्याधिक चिसोका कारण उच्च रकतचाप भई ब्रेन हेम्रेज भएकाले मृत्युु भएको हो ।अत्यधिक जाडो भएपछि जाडो छल्न आगो ताप्दा  बिजयपुर लक्ष्मिनिया टोलका राजेश माझी मुसहरकी श्रीमती ईन्दुु देवी गम्भिर घाईते भइन् । २२ बर्षिया ईन्दुको बिरगंजस्थित नारायणी उप क्षेत्रिय अस्पतालमा उपचार भईरहेको छ ।

यी त भए केही प्रतिनिधि उदाहरण मात्र, रौतहट निर्वाचन क्षेत्र ३ ‘ख’ का सांसद कुुन्दन कुुश्वाहाका अनुसार लगातारको शीतलहरले रौतहटमा कठयांग्रिएर ज्यान गुमाउनेको संख्या १३ पुुगेको छ । तर, प्रहरी तथ्यांकमा भने यो संख्या झण्डै आधामात्रै छ । ‘रौतहटमा कठयांग्रिएर हालसम्म आठजनाको मात्रै ज्यान गएको छ’ जिल्ला प्रहरी प्रवक्ता डिएसपी राम कुुमार दानी बताउँछन् । तर, स्थानीयले भने १३ जनाको मृत्यु भइसकेको बताएका छन् ।

अहिलेसम्म चिसोका कारण मृत्यु हुनेहरु 

१.बैद्यनाथ साह, कटहरिया नगरपालिका ४ हर्षाहा
२.फुलकुमारी देवी, गुजरा नपा ७
३.अलख सिंह, राजदेवी नपा
४.चकली देवी, दुर्गा भगवती गापा ५
५.लालु राउत, गौर नपा २
६.रामपुकारी देवी, गौर नपा ४
७.बेचबहादुर राना,गौर नपा ५
८.बिद्या महतो, गौर नपा ५
९.अवधी राय, राजदेवी नपा ७
१०.शेख समिम,परोहा–२
११.मरछिया देवी परोहा–९
१२. नेक महमद मियाँ, गढिमाई
१३.महर्जन ठाकुर, गढिमाई नपा ४

बर्षायामामा बाढी र हिउँदमा शीतलहर मधेसी जनताका लागि अभिसाप नै बन्ने गरेको छ । बर्षामा रौतहटमा बर्षेनी दर्जनौ मानिस डुुबेर ज्यान गुुमाईरहेका छन् भने हिउँदमा न्यानो कपडाको अभावमा ज्यान गुुमाईरहेका छन् ।

पुष पहिलो साताबाटै सुरु भएको शीतलहर अझै जारी छ । दिनभर लाग्ने हुस्सु र चल्ने चिसो हावाले कतिको ज्यान लिइसकेको छ त कति कष्टपुर्ण ढंगले बाँचिरहेका छन् ।

सदरमुकाम गौर, चन्द्रपुर,गरुडा,कटहरिया लगायतका बजारमा मानिसको चहलपहल दैनिक घटदै गएको छ । ब्यापार ब्यवसाय ठप्प प्राय छ ।

दीर्घकालिन व्यवस्थापनको अभाव

शीतलहरबाट यति धेरैको ज्यान गइसकेको र बाँकी रहेकाहरुले पनि कष्टपूर्ण जिउन बाध्य भएपनि राहतका लागि स्थानीय प्रशासनले दीर्घकालिन र प्रभावकारी पहलकदमी गरेको पाइदैन । जिल्ला प्रशासन कार्यलय, नेपाल प्रहरी,नेपाली सेना र बिभिन्न दातृ निकायबाट जिल्लाका केही स्थानमा न्यानो कपडा बितरण तथा बजारचोकमा दाउरा बालिएको समाचार आएपनि ति समाचार सञ्चारमाध्यममै सिमित छन् । कतिपयले त पीडितहरुलाई सहयोगको नाममा चाउचाउ, विस्कुट र एकदुई जोर कपडा दिएको फोटो खिचाएर आफ्नो प्रचार प्रसार गरेर धन्दा नै चलाइरहेका समेत गुनासा आइरहेका छन् ।

जिल्लाका १८ वटा स्थानीय तहको बजारबाहेक दलित,बिपन्न टोलहरुमा न्यानो कपडा र दाउराको व्यवस्था गर्न कसैको ध्यान गएको छैन ।स्थानीय प्रशासनले प्रत्येक स्थानीय तहलाई गाउँ टोलमा दाउरा बितरण गर्न अनुुरोध गरेपनि त्यो औपचारिकतामा मात्रै सिमित छ ।

नगरपालिकाको दावी

नगरपालिकाले एउटा वडामा दुुई ट्याक्टरसम्म दाउरा बितरण गरेको दावी गरेको छ । उक्त दाउरा सिमित स्थानमा मात्र पुुगेकाले अधिकांश मानिसले पाउन नसकेको निर्वाचन क्षेत्र ३ क का सांसद नागेन्द्र यादव बताउँछन् । दलित मुुक्ती मोर्चाका केन्द्रिय सदस्य रामनाथ माझी मुशहरले मुुसहर,डुम, चमार,तत्मा,धनखार,लगायत दलितहरु बिप्पन मात्र नभई निमुखा समेत रहेकाले यस्तो अवस्थामा बिशेष निगरानी गर्नुपर्ने सरकारको दायित्व रहेको बताउँछन् ।

रौतहटका प्रमुख जिल्ला अधिकारी उद्धव बहादुर थापाले जिल्लाका बिभिन्न स्थानमा दाउरा,तीनसय थान कम्बलबितरण गर्नुुका साथै बिभिन्न गैरसरकारी संस्थामार्फत न्यानो कपडा बितरण गर्न लगाएको बताउँछन् । भन्छन् –‘सशस्त्र प्रहरीमार्फत २८ सय ज्याकेट र तीन सय न्यानो सलको थप ब्यवस्था हुदैछ ।’ Source: ratopati.com