मंगला गाउँपालिमा पूर्वाधार निर्माणमा गौरवका योजना सञ्चालन

कमल खत्री । म्याग्दीको मंगला गाउँपालिकाले पूर्वाधार निर्माणमा ६ वटा गौरवका योजना सञ्चालन गरेको छ । चालु आर्थिक बर्ष २०८१/८२ का लागि गाउँसभाबाट छनोट भएका र संघ र प्रदेश सरकारबाट प्राप्त सडक, भवन लगायतका ठूला योजनालाई ठेक्का प्रकृया मार्फत कार्यान्वयन गर्न सुरु गरिएको हो ।

गाउँपालिकाले संघीय समपूरक योजना अन्तगर्त सबैभन्दा ठूलो योजनाको रुपमा रु ४ करोड ४० लाख बजेटको सिम–कोत्रबाङ–खुम्ल्याह–पैयुपाटा–कुहुँ–पूर्णगाउँ–टोड्के सडक स्तरोन्नती योजना र रु ३ करोड ४० लाख बजेट रहेको पुलचोक–पिपलबोट–पाँखु–धारा–सिरकुम–टिकाबाङ मोटरबाटो स्तरोन्नती योजना सञ्चालन गरेको छ ।
प्रदेश समपूरक योजनाबाट गण्डकी प्रदेश सरकारको रु ६० लाख र गाउँपालिकाको रु ४० लाख बजेट रहेको बाबियाचौर–काफलचौर–सल्यान–भर्जुला– मोटरबाटो स्तरोन्नती योजनामा धमाधम निर्माण कार्य भैरहेको छ भने प्रदेश विशेष अनुदान अन्तगर्त महेन्द्ररत्न मावि बरंजाको छात्रावास भवन क्रमागत योजनाका लागि प्राप्त रु ४३ लाख बजेटको काम सम्पन्न भएको छ ।
त्यसैगरि संघीय विशेष अनुदानबाट रु २ करोड ६५ लाख बजेटबाट मंगला शिक्षा क्याम्पसमा छात्रावास भवन बनाउने योजना समेत अघि बढाएको छ । संघीय ससर्त योजना अन्तगर्त रु ८० लाख बजेट रहेको मंगला– ५ को डिही किरियापुत्री भवन निर्माण योजना ठेक्का मूल्यांकनको चरणमा रहेको गाउँपालिकाका प्रमुख प्रशासकीय अधिकृत गोपाल शर्माले जानकारी दिनुभयो ।
‘‘ संघ प्रदेश बाट प्राप्त भएका योजना, साझेदारीमा सञ्चालन हुने र गाउँपालिकाको समेत ठूला योजनाहरुलाई ठेक्का मार्फत कार्यान्वनय गर्न सुरु गरेका छौँ, कतिपय योजनाहरुको निर्माण कार्य समेत अन्तिम चरणमा पुगेको छ, निर्माण कार्यलाई गुणस्तरीय बनाउन पालिकाबाट निरन्तर अनुगमन भैरहेको छ’’– प्रमुख प्रशासकीय अधिकृत शर्माले भन्नुभयो ।
सिम–कोत्रबाङ–खुम्ल्याह–पैयुपाटा–कुहुँ–पूर्णगाउँ–टोड्के सडक स्तरोन्नती गर्ने संघीय समपूरक बजेट अन्तर्गत संघीय सरकार र गाउँपालिकाको ५०/५० प्रतिशत लागत साझेदारी रहेको यस योजनाका लागि त्रिशक्ति कन्ट्रक्सन एण्ड इञ्जिनियरिङ प्रा.लि.ले रु ३ करोड १३ लाख ६८ हजार १४९ मा ठेकका सम्झौता गरेर कार्यक्षेत्रमा परिचालन भएको छ ।
आगामी असार १० भित्र निर्माण कार्य सम्पन्न गर्ने लक्ष्य सहित निर्माण व्यवसायि कार्यक्षेत्रमा परिचालन भएको गाउँपालिकाले जनाएको छ । सिमचोकबाट सडक फराकिलो बनाउने, ग्याविन पर्खाल लगाएर स्तरोन्नती गर्न थालिएको यस योजनामा यसबर्ष ३५० मिटर सडक ढलान हुनेछ । सिमचोक, पातलको उकालो, कुहुँ र पूर्णगाउँ क्षेत्रमा सडकमा ग्याविन जाली लगाउने, मेसिनरी पर्खाल निर्माण गर्ने र सडक सुरक्षाका काम गरेर सडकलाई स्तरोन्नती गरिने गाउँपालिकाका सब–इन्जिनियर विपिन आचार्यले जानकारी दिनुभयो ।
यस अघि गत बर्ष कोत्रबाङ बस्ती क्षेत्रमा ६६० मिटर सडकलाई कालोपत्रे गरिसकिएको छ भने २५० मिटर सडक ढलान समेत गरिएको छ । गाउँपालिकाको केन्द्र बावियाचौरदेखि वडा नम्बर २ को हिदी जोड्ने बावियाचौर–काफलचौर–सल्यान–भर्जुला हिदी सडकखण्डको भाइबाङ्गखोला काफलचौर खण्डमा सडक ढलान गर्न थालिएको छ ।
कुल रु १ करोड बजेट विनियोजन भएको यस योजनामा ठेक्का मार्फत रु ९४ लाखमा ठेक्का लिएको मंगला कन्स्ट्रक्सन प्रा.लिले सडक ढलानको कामलाई तिब्र बनाएको छ । एक महिनादेखि कार्यक्षेत्रमा परिचालन भएको निर्माण कम्पनीले ग्याविन जाली, मेसिनरी पर्खाल र प्लम पर्खाल लगाएर सडक ढलानको काम अघि बढाएको गाउँपालिकाका असिस्टेन्ट सब इन्जिनियर आचार्यले जानकारी दिनुभयो ।
उहाँका अनुसार, यस सडकखण्डमा ६ मिटर फराकिलो र ११० मिटर सडकलाई यस बर्ष ढलान गरिनेछ । यस सडकखण्डमा यस अघि २६० मिटर सडकलाई ढलान गरिसकिएको छ । पुलचोक–पिपलबोट–पाँखु–धारा–शिरकुम–टिकाबाङ मोटरबाटो स्तरोन्नती योजनामा ठेक्का लिएको डिभाइनलाइट आचार्य मंगला जेभीले ५० प्रतिशत निर्माण कार्य सकेको छ ।
पिपलबोट क्षेत्रमा सडकलाई फराकिलो बनाएर ग्याविन जाली, प्लम पर्खाल, मेसिनरी पर्खाल लगाएर सडकलाई ग्राभेल सहित स्तरोन्नती गर्ने र मुहानेको उकालोमा करिब दुई सय मिटर सडक ढलान गरिने गाउँपालिकाका सब इञ्जिनियर रुचेन्द्र अधिकारीले जानकारी दिनुभयो । यस सडकखण्डमा गत बर्ष हाँडेभिर नजिकको सडकमा ग्राभेल गरिएको थियो ।
मंगला शिक्षा क्याम्पसको छात्रावास भवनको ठेक्का लिएको आचार्य मंगला जेभीले गत बर्ष निर्माण सुरु भएको भवनलाई पूर्णता दिने र नयाँ एक तले भवन बनाउने कामलाई तिब्रता दिएको छ । यस योजनाबाट छात्रावास भवन क्षेत्रलाई मेसिनरी पर्खाल निर्माण गरेर घेरावार गर्ने योजना छ ।
गाउँपालिकाले यस बर्षमा कुल ११६ वटा पूर्वाधार निर्माणका योजना कार्यान्वनयमा ल्याएकोमा अहिलेसम्म ७१ वटा योजनाको सम्झौता भएको र ४५ वटा सम्झौताको चरणमा रहेको प्रशासकीय अधिकृत सुदर्शन पौडेलले जानकारी दिनुभयो । ‘‘ ठेक्का र उपभोक्ता समितिबाट कार्यान्वयन हुने योजनाहरुमध्ये सम्झौता भएका योजनाहरुमा धमाधम काम भैरहेको छ, बाँकी रहेका योजनाहरुको लागत स्टिमेट तयार गर्ने काम भैरहेको छ’’– उहाँले भन्नुभयो । गाउँपालिकाले पूर्वाधार निर्माणतर्फ सडक, खानेपानी, सिँचाइ, पदमार्ग, भवन, निर्माणलगायतका योजना छनौट गरेको छ ।