मुक्तिधाम माविमा आधारभूत तहको अन्तर विद्यालय हाजिरीजवाफ प्रतियोगिता सम्पन्न

म्याग्दीको रघुगंगा गाउँपालिका–२ भगवतीमा अवस्थित मुक्तिधाम माध्यमिक विद्यालयमा कक्षा ५ सम्मको आधारभूत तहको अन्तर विद्यालय स्तरीय हाजिरीजवाफ प्रतियोगिता शुक्रवार सम्पन्न भएको छ । प्रतियोगितामा मुक्तिधाम मावि प्रथम, ज्ञानोदय मावि द्धितिय र नर्थ स्टार बोडिङ स्कुल तृतीय हुन सफल भएका छन् ।
प्रतियोगितामा प्रथम, द्धितिय र तृतीय हुन सफल विद्यालयका विद्यार्थीहरुलाई क्रमश ः नगद रु तीन हजार, दुई हजार र एक हजारको साथमा प्रमाणपत्रद्धारा पुरस्कृत गरिएको छ । प्रतियोगितामा विभिन्न ९ विद्यालयले सहभागिता जनाएका थिए भने सहभागी विद्यालयका विद्यार्थीहरुलाई समेत स्टेशनरी सामाग्रीद्धारा सान्त्वना पुरस्कार प्रदान गरिएको थियो ।

प्रतियोगिता सञ्चालनको लागि विद्यालयका पूर्व विद्यालय व्यवस्थापन समितिका अध्यक्ष समेत रहनुभएका समाजसेवी देवेन्द्रबहादुर मल्लले आफ्नो जन्मदिनको अवसरमा रु १० हजार सहयोग गर्नुभएको थियो । कार्यक्रममा समाजसेवी मल्ल, वडा अध्यक्ष अमृत भण्डारी, विद्यालय व्यवस्थापन समितिका अध्यक्ष लक्ष्मीप्रसाद सुवेदी, प्रधानध्यापक अमरबहादुर केसी , पूर्व स्रोत व्यक्ति तप्तबहादुर थापा, लगायतले पुरस्कार प्रदान गर्नुभएको थियो । विद्यालयका प्रअ केसीको अध्यक्षता र समाजसेवी मल्लको प्रमुख आतित्यथामा सम्पन्न कार्यक्रममा विद्यालयका शिक्षकद्धय विष्णु प्रसाद रेग्मी र मेघा रिजालले सहजीकरण गर्नभएको थियो ।