समुदायको गुनासो सुन्न आज बेनीमा काँग्रेसको सार्वजनिक सुनुवाई 

  • २१ माघ २०८०, आईतवार
  • 183 पटक पढिएको

 

म्याग्दीको सदरमुकाम बेनीस्थित बिरेन्द्रचोकमा आइतबार नेपाली कांग्रेसको ‘समुदायमा कांग्रेस’ अभियान अन्तरगत सार्वजनिक सुनुवाईको आयोजना गरिएको छ । प्रतिनिधिसभाका सदस्य तथा यूवा नेता प्रदिप पौडेलको प्रमुख आतिथ्यतामा हुने सुनुवाई कार्यक्रममा म्याग्दीबासीले अपेक्षा, सुझाव र गुनासा राख्न पाउने कांग्रेस म्याग्दीका कार्यवाहक सभापति हरिकुमार श्रेष्ठले बताए ।

समुदायमा पुगेर जनताका अपेक्षा, सुझाव र गुनासा सुन्ने नेपाली कांग्रेसको ‘समुदायमा कांग्रेस अभियान’ अन्तरगत आइतबार ११ बजेदेखि सार्वजनिक सुनुवाई हुने कांग्रेसले जनाएको छ । स्थानीय स्तरमा सेवा प्रवाहको अवस्था, विकास निर्माण र समुदायमा भएका असल अभ्यासको अवलोकन गर्ने, जनताबाट आएका सुझावलाई त्यहीँ कार्यान्वयनका लागि पहलकदमी लिनका लागि यो अभियान सञ्चालन गरिएको हो । यस अभियानमा औपचारिक आसन ग्रहण र मन्तव्यलगायत कार्यक्रमहरू छैनन् भने सुरुमै पार्टीको वर्तमान अवस्था र अब गर्नुपर्ने कामका लागि सुझाव माग गरिने छ ।सर्वसाधारणलाई कांग्रेसप्रति र समुदायमा आवश्यकता र समस्याका बारेमा आफ्ना समस्या र गुनासाहरु खुलेरै राख्न आग्रह गरिएको छ ।