आफ्नै पौरखबाट गुरुङले गरे रहरलाग्दो आम्दानी(फोटोफिचर)

म्याग्दी, २८ जेठ । घर खर्च जुटाउन लामो समय विदेश बसेका बेनी नगरपालिका ४ बासकुनाका तिलक गुरुङको दैनिकी अहिले फेरिएको छ । १५ बर्ष अगाडी सम्म परिवारको गुजारा चलाउन विदेशको भुमिमा पसिना बगाएका गुरुङ अहिले आफ्नै मेहनतबाट प्राप्त आम्दानीबाट दङ्ग छन् ।

 
धान रोप्दै आएको १६ रोपनी जग्गामा अहिले ७ सय सुन्तलाको विरुवा लगाएका छन् । फल दिने ३५० बोटकोे सुन्तला विक्रिबाट गतवर्ष ४ लाख आम्दानी गर्न सफल भएको उनले बताए । सुन्तला खेतीमा सिचाई गर्न अन्तराषर््िट्रय स्तरको फर्टिगेसन सिचाई आयोजना विकास गरेका छन्। ५९ सालबाट सुन्तला खेती सूरु गरेको गुरुङले विगत ७ बर्ष देखि सुन्तला संगै कुखुरा र गाईभैसी पालनबाट राम्रो आम्दानी गर्न सफल भएका हुन् ।

 

त्यस्तै उनले सुन्तलासंगै १५ ओटा गाईभैसी र अण्डा उत्पादन हुने ३ हजार लेस कुखुरा पाल्दै आएका छन् । कुखरा पालनबाट दैनिक २७ हजारको आम्दानी हुने उनले बताए । त्यस्तै पन्ध्र ओटा उन्नत जातका गाई भैसी पालनबाट दैनिक ५० लिटर दुध उत्पादन हुने बताए ।

“मासिक रुपमा दुध उत्पादनबाट एक लाख आम्दानी र अण्डाबाट सात लाख आम्दानी  हुने” उनले बताए । दाना पानी र कामदारको तलब कटाएर मासिक दुई लाख बचत गर्दै   आएका छन् । साथै उनले ४ देखि ६ जनालाई नियमित रोजगार पनि दिदै आएका छन् ।,   साथै  छोराछोरीको पढाई खर्चमा समस्या नआएको उनले बताए ।

गुरुङ आफुले मात्र आम्दानी गरेका छैन्नन् गाउँमा सबैको लागि अहिले प्रेरणाको स्रोत पनि बनेका छन् । गुणस्तरीय रुपमा कृषि उपज गर्न सकेमा बजारको समस्या नहुने उनको अुनभव छ । फलफूल र पशुपालन ब्यवसायबाट केन्जन बहुउद्देश्यीय  कृषि फर्म  ४० लाख लगानी गरी संचालन गरेका गुरुङले बार्षिक ४५ लाखको कारोबार गर्दै आएका छन् ।

गुरुङले संचालन गरेको कृर्षि फर्म जिल्लाकै नमुना रहेको जिल्ला कृषि विकास कार्यालयका बरिष्ठ कृषि विकास अधिकृत श्यामप्रसाद रिजाले बताए । उनले कृषकहरुलाई कार्यालयले विभिन्न प्याकेजमा प्रोत्साहन कार्यक्रम दिदै आएको बताए ।
सुन्तला र पशुपालनमा जिल्लाकै नमुना कृषकको रुपमा परिचय बनाएका गुरुङको फर्म हेर्न जिल्लाका कृषकहरुको लागि भ्रमणको केन्द्र पनि बनेको छ ।