मनाङमा अधिक चिसोले खोला र झरना नै जमे !

लमजुङ — हिमाली जिल्ला मनाङमा अत्याधिक चिसोका कारण ठाडो खोलाका पानी जम्न थालेको छ । बगेको पानी चट्टान जस्तै साह्रो बनेको छ । मनाङको चामेमाथिका ठाडोखालामा बग्दै गरेको पानी जमेको स्थानीयले बताए । मर्स्याङ्दी नदीको छेउछाउ पनि जमेको स्थानीयले बताएका छन् । चामेकी खरिमाया गुरुङका अनुसार पिउनको लागि हिउँ पगाल्नु परेको छ। पाइपभित्र पानी जमेकाले धारा बन्द छन्। मानिसहरु बाहिर निस्कन सकेका छैनन्। ‘सिंगो बजार सुनसान छ। ढोकाहरु बन्द छन्। २ वटा पसलमात्रै खुले,’ उनले सोमबार कान्तिपुरसित भने। ‘चिसो बढेपछि कोही बेंसी झरे। बेंसी नझरेकाहरु झ्यालढोका थुनेर घरमै बसेका छन्,’ उनले भने।