नेविसंघको आयोजनामा बेनीमा शुभकामना आदान प्रदान

म्याग्दी, ७ असोज । नेविसंघ म्याग्दीले बिजया दशमी तथा शुभदिपावलीको अबसरमा शनिवार बेनीमा शुभकामना आदान प्रदान कार्यक्रम सम्पन्न गरेको छ । नेविसंघ म्याग्दीका कार्यबहाक अध्यक्ष एकेन्द्र महतको अध्यक्षतामा भएको कार्यक्रममा बोल्दै नेपाली काँग्रेस म्याग्दीका सभापती खमविर गर्वुजाले आसन्न प्रदेश र प्रतिनिधि सभा निर्वाचनमा काँग्रेसको पक्षमा नतिजा ल्याउने गरि पार्टीको प्रचार प्रसारमा जुट्न नेविसंघका नेता तथा कार्यकर्ताहरुलाई आग्रह गर्नुभयो ।

उहाँले पार्टीको क्रियाशिलता र सक्रियता बढाउन नेविसंघले विगतदेखि खेलेको भूमिका महत्वपूर्ण रहेको भन्दै आगामी दिनमा समेत प्रजातन्त्र, लोकतन्त्र र समाजवादको निम्ती सक्रिय भएर लाग्न आग्रह गर्नुभयो ।

सो कार्यक्रममा काँग्रेस जिल्ला सदस्य माधव प्रसाद रेग्मी, अजयमिलन श्रेष्ठ, क्याप्टेन मिनबहादुर कार्की, शिक्षक संघका अध्यक्ष दुर्गाराम सुवेदी, तरुण दल अध्यक्ष मुकुन छन्तयाल , नेपाल निजामती कर्मचारी युनियन संघका अध्यक्ष लिलानाथ पौडेल, नेविसंघमा नवप्रवेशी राम घताने लगायतले मन्तव्य राख्नुभएको थियो ।

यसैबिच सोही कार्यक्रममा नेविसंघमा प्रवेश गरेका अनेरास्ववियूका जिल्ला सदस्य राम घतानेलाइ संघका कार्यबहाक अध्यक्ष महत र पार्टी सभापती गर्वुजाले सदस्यता प्रदान गर्दै स्वागत गरेका थिए । कार्यक्रममा विद्यार्थी नेता सुजन बरुवालले स्वागत र सचिब चक्र केसीले कार्यक्रमको सञ्चालन गर्नुभएको थियो ।