बेमौसममा हिमपात, बर्षाले किसानलाई राहत

म्याग्दी, ९ चैत । म्याग्दीमा शनिवार माथिल्लो भेगमा हिमपात र पहाडी क्षेत्रमा हिउँदे बर्षा भएको छ । लामो समयपछि भएको बर्षाले किसानलाई राहत भएको छ । बर्षा नहँदा हिउँदे गहँु, जौ, आलु लगायतका खाद्यबाली र तरकारी खेती संगै फलफुल खेतीसमेत प्रभावित बनेको थियो ।
हिउँदमा बर्षा नभएर बाली नै सुक्ने अवस्थामा पुगेको थियो । बर्षाले खेतवारीमा लगाएको मकै, सिमी लगायतको खेतीबाली र फलफुल बगैँचामा सिंचाई भएको रघुगंगा गाउँपालिका– ३ का नरबहादुर भण्डारीले बताउनुभयो । उहाँका अनुसार, लामो समयपछि शनिवार दिउँसोदेखि जमिन भिज्ने गरी भएको बर्षाले किसानलाई राहत भएको छ ।

यसैबिच यस बर्ष म्याग्दीको उच्च पहाडी क्षेत्रमा दोस्रो पटक हिमपात भएको छ । जिल्लाको गुर्जा, कुइनेमंगले, मल्कबाङ लगायतका उच्च पहाडी क्षेत्रमा साँझपखबाट हिमपात हुन थालेको छ । हिउँदयाम सुख्खा हुँदा खेतीबाली संगै घाँसपात समेत सुकेको अवस्थामा बर्षा हिमपातले राहत भएको धवलागिरि गाउँपालिका–५ मल्कबाङका भेडापालक कृषक हिमबहादुर छन्त्यालले बताउनुभयो ।

हिउँदभर हिमपात र बर्षा नभएपनि शनिवार बमौसमी हिमपात भएको हो । जिल्लाको पुनहिल, घोडेपानी, खोप्रालेक, खयरलेक, मोहरेडाँडा लगायतका पर्यटकीय स्थलहरुमा समेत हिमपात भएको छ । बमौसमी हिमपात भएपछि हिउँमा रमाउनका लागि आन्तरिक पर्यटकहरुको चहलपहल बढ्ने पर्यटन व्यवसायीहरु बताउँछन् ।