एबिसी तार विस्तार गरेपछि विद्युतिय दुर्घटनाको जोखिम हट्यो

म्याग्दी ३ चैत । म्याग्दीको बेनी नगरपालिका– ४ सिंगाको थामडाँडामा विद्युत वितरण लाइनमा नाङ्गो बिजुलीको तार हटाएर एबिसी केबल तार विस्तार गरिएको छ । गाउँभित्र सुन्तलाको फलफुल खेती रहेको र वरपर वनजंगल रहेकाले नाङ्गो बिजुलीको तारले करेन्ट लाग्ने र विद्युतिय दुर्घटनाको जोखिम बढेपछि नेपाल विद्युत प्राधिकरण म्याग्दी वितरण केन्द्रबाट थामडाँडा क्षेत्रमा एबिसी तार टाँगीएको हो ।
विगत केहि बर्ष अघिबाट सुरु गरिएको विद्युतिकरण अभियानको क्रममा केहि नयाँ पोलहरु समेत गाडीएको भएपनि सुन्तला बगैँचा र रुख विरुवाको कारण समस्या भएपछि एबिसी केबल तार विस्तार गरिएको वितरण केन्द्रका प्राविधिक प्रमुख प्रकाश झाले जानकारी दिनुभयो । उहाँका अनुसार, थामडाँडा क्षेत्रमा करिब २ किलोमिटर क्षेत्रमा विजुलीको नाङगो तार विस्थापित गरेर एबिसी तार विस्तार गरिएको छ ।
थामडाँडा, बदामखोरीया, हल्दारचोक, कलङपुर, देविनडाँडा क्षेत्रमा नाङ्गो विजुलीको तार हटाएपछि सम्भावित विद्युतिय दुर्घटनाको समस्या हल भएको स्थानीय अगुवा राजु गुरुङले बताउनुभयो । ‘‘ गाउँमा रुख विरुवा भएकाले नांगो तारले कतिबेला करेन्ट लाग्ने हो भन्ने त्रास थियो, कतिपय समयमा रुखका हाँगाले छुँदा विद्युत अनियमित हुने समस्या थियो, नागरिकको घर नजिक बिजुलीको पोल गाडेपनि रुख विरुवामा छुने भएकाले तार नै टाँगीएको थिएन, अहिले एबिसी केबल तार टाँगेपछि नागरिकलाई सहज भएको छ’’– उहाँले भन्नुभयो ।
नाङ्गा बिजुलीको तार हटाएर एबिसी तार विस्तार गरेपछि यस क्षेत्रका करिब दुई सय घरधुरीमा विस्तार भएको ग्रामीण विद्युतिकरण सेवा सुरक्षित र भरपर्दो बनेको छ । एउटै लठोभित्र सबै तार रहने र बाहिरबाट कालो बाख्लो तारले ढाकिएको हुने भएकाले एबिसी तारको विद्युतिकरणले करेन्टको सुरक्षा, विद्युत् आपूर्तिमा भरपर्दो हुनुका साथै बस्तीको विद्युतिकरण व्यवस्थित गराउने सघाउ पु¥याउने गर्छ । म्याग्दीमा बजार क्षेत्रका साथै ग्रामीण भेगमा समेत नाङ्गो विजुली तारको सट्टा एबिसी तार विस्तारलाई प्राथमिकतामा राखिएको छ ।