पवित्र आमा समुहद्धारा गलेश्वरका भक्तजनलाई निशुल्क जलपान

म्याग्दी, ३० साउन । श्रीकृष्ण जन्माष्टमी तथा साउने सोमबारको अबसरमा पुजापाठ तथा दर्शनको लागि म्याग्दीको प्रसिद्ध धार्मिक स्थल गलेश्वरधाममा पुगेका भक्तजनहरुलाई पवित्र आमा समुहले निःशुल्क जुस खुवाएका छन् । सोमबार गलेश्वरमा आएका भक्तजनहरुलाई रघुगंगा गाउँपालिका–३ मौवाफाँटमा रहेको सो आमा समुहले निःशुल्क रुपमा जुस खुवाएका हुन् ।

मन्दिर परिसरमा वितरण गरिएको निःशुल्क जुस वितरणमा आमा समुहका अध्यक्ष कमला केसीको नेतृत्वमा आमा समुहका पदाधिकारी तथा सदस्यहरु परिचालन भएका थिए । सो क्रममा करिब १ हजार बढीलाई जुस वितरण गरिएको आमा समुहले जनाएको छ । मन्दिरमा आउने भक्तजनहरु भोकै आउने र गर्मिको कारण अस्वस्थता हुन सक्ने भएकाले निःशुल्क रुपमा जुस वितरण गरिएको अध्यक्ष केसीले बताउनुभयो । सो आमा समुहले दैवि प्रकोप तथा भैपरि आउने सामाजिक समस्याहरुमा विभिन्न रचनात्मक कार्यहरु गर्दै आएको छ ।