म्याग्दीमा मनाईयो सहकारी दिवस

  • २० चैत्र २०८०, मंगलवार
  • 69 पटक पढिएको

मुलुक तीन खम्बे अर्थनीति अनुसार चले पनि सहकारीको नियमन तथा निगरानीमा राज्य संयन्त्र पनि कमजोर भएको जस्तो देखिएको गण्डकी प्रदेशसभा सदस्य हरी भण्डारीले बताउनुभएको छ । राष्ट्रिय सहकारी दिवसको मुल समारोहमा सम्बोधन गर्दै भण्डारीले मुलुकको आर्थिक समृद्धिका लागि तीन खम्बे अर्थनीति भनिएतापनि सबै खम्बालाई मजबुत बनाउनका लागि प्रयास गरिनु पर्ने भएतापनि सहकारीलाई त्यस प्रकारको दृष्टिले राज्यले नहेरेको जस्तो देखिएको बताउनुभयो । उहाँले अहिले सहकारी प्रति नकारात्मक टिप्पणी भएको भएतापनि सहकारी ऐन तथा नियम अनुसार सञ्चालित सहकारीमा कुनै समस्या नभएको बताउनुभयो । कहि कतै सहकारीका सञ्चालकले बचतकर्ताको रकम हिनामीना गरेको कुरा आएको भए पनि त्यो पैसा कुनै हालतमा बचतकर्ताले फिर्ता पाउने उहाँको तर्क थियो । राज्य संधै जनताको पक्षमा हुन्छ र हुनै पर्छ त्यसैले अहिलेको अवस्थामा पनि सहकारीमा कोही पनि जनताको पैसा हरायो वा डुब्यो भन्ने हुँदै होइन त्यो फिर्ता हुन्छ पक्का हुन्छ–भण्डारीले भन्नुभयो ।
प्रमुख जिल्ला अधिकारी लक्ष्मण ढकालले राज्यले सहकारीलाई सहयोग गरेको बताउँदै सहकारीको वर्तमान अवस्था पनि राज्य पनि चिन्तीत रहेको बताउनुभयो । उहाँले एक प्रसंगमा भन्नुभयो–‘अहिले सहकारीमा आएको संकटले गर्दा कतिपय अवस्थामा प्रशासनबाट प्रतिनिधित्व गर्नु पर्ने अवस्थामा पनि प्रशासनबाट जान डराउने गरेका छन् ।’ राज्यको कानुनले नै सहकारीलाई अर्थतन्त्रको तीन खम्बा मध्येको एक मानेकोले कुनै एक खम्बा कमजोर हुँदा मुलुकको अर्थतन्त्र पनि राम्रो नहुने तर्फ सबै सचेत हुन पर्ने धारणा राख्नुभएको थियो ।
म्याग्दी उद्योग बाणिज्य संघका प्रथम उपाध्यक्ष लिलाराम गौतमले जनताको बचत नै सहकारीले लगानी गरेको हुनाले त्यो ऋण पनि उठाइने र जनताले पनि आफ्नो बचत फिर्ता पाउने बताउनुभयो । बचत फिर्ताका लागि केही ढिला हुन सक्ला तर कोही पनि आफ्नो दायित्वबाट भाग्न नमिल्ने उहाँको भनाई थियो । तीन खम्बे अर्थनीति हुँदा सबै खम्बा उस्तै बलियो भयो भने मात्रै राम्रो हुने भएकाले सहकारी नामको खम्बालाई जसरी पनि मजबुत तथा बलियो बनाइनु पर्ने उहाँको भनाई थियो ।
सहकारी दिवसको मुल कार्यक्रम पूर्व विभिन्न प्रारम्भीक सहकारीको ब्यानर सहितको ¥यालीले बेनी बजारको परिक्रमा गरेको थियो । बजार परिक्रमा पछि जिल्ला समन्वय समितिको सभाहलमा पुगेर मुल कार्यक्रममा परिणत भएको थियो । मुल कार्यक्रम जिल्ला सहकारी संघ म्याग्दीका अध्यक्ष प्रेमबहादुर कार्कीको अध्यक्षता, उपाध्यक्ष ज्ञानेन्द्रप्रसाद सुवेदीको स्वागत र सदस्य तेजकुमारी बानियाँको सञ्चालनमा सम्पन्न भएको थियो ।