कालीगण्डकी बचाऔँ अभियान : ‘नदी सप्तक’ पोस्टर कविता शृङ्खला ~ ६

नदीको उद्घोष

—————

ओरालो झर्दैझर्दै

ओरालोको पिँध चुम्नु- मेरो गौरव हो !

पहिचानको सहअस्तित्वको गीत गाउँदैगाउदै

विशिष्ट पहिचान निर्माण गर्नु- मेरो संस्कार हो !

मभित्र जीवन्त बाँचेको कालिगडीले

तिमीलाई ईश्वर उपहार दिनु- मेरो कला हो !

झर्नु विस्तारित हुनु हो

बग्दा हर्षविभोर हुन्छु म

जम्नु व्यर्थ हो- मेरा लागि

ढुंगाका छातीमा काउकुती लगाउँदै दौडिनु

किनारका हातहरू समाउँदै यात्रा गर्नु

हामीबीचको त्रिकोणात्मक प्रेम हो !

तर जब,

हाम्रो प्रेमको फूलबारीमा

कर्कश क्रसर चलाउँछौ तिमी

विक्षिप्त हुन्छु म

विक्षिप्त मन लिएर

मेरो हराएको प्रेम खोज्दैखोज्दै

म तिम्रो घर पस्छु

मेरो पीडाको भलले

भत्किन्छौ, टुट्छौ र हराउँछौ तिमी

प्रिय मान्छे !

यसमा मेरो कुनै दोष छैन

तिम्रो अस्तित्व जोगाउनु- मेरो कर्तव्य हो

तिमीले पनि हाम्रो प्रेममा आँखा नलगाउनु

बुझ्नु-

प्रेममा धोका खाएको प्रेमी कति हिंस्रक हुन्छ !

० ० ०

लमजुङ

…

सम्बन्धित शिर्षकहरु