दग्नामको पहिचान बनेको भुमे पुजामा लिङ्गो जुधाइ, गैरी गाउँ बिजयी (फोटो फिचर)

म्याग्दी, १५ जेठ । म्याग्दीको रघुगंगा गाउँपालिका–४ दग्नाममा परम्परागत रुपमा भुमे पुजाको अवसरमा हुने लिंङ्गो जुधाई मंगलवार सम्पन्न भएको छ । हरेक बर्षको जेठ महिनामा मनाइने भूमे पुजाको अवसरमा आयोजना गरिएको लिंङ्गो जुधाउने प्रतियोगितामा बिगतमा झै गैरी गाउँ र कान्छी गाउँबाट अग्ला लिंगोहरु जुधाउँदा गैरी गाउँ बिजयी भएको हो ।

करिब चार सय बर्ष पुरानो इतिहाँस बोकेको मानिने लिङ्गो जुधाउने कार्यक्रमलाई यो बर्ष पनि दग्नामबासीले निरन्तरता दिएका हुन् । बिशेष गरी प्रकृति पुजाको रुपमा चिनिने भुमे देवतालाई खुसी बनाउन दग्नाममा दुई गाउँ बिच लिङ्गो जुधाउने गरिन्छ ।

दग्नामको भूमे पुजाको मुख्य आक्रषणको रुपमा रहेको लिङ्गो जुधाउने प्रतिस्पर्धामा दग्नामको गैरी गाउँ र कान्छी गाउँले सहभागीता जनाउँदै आएका छन् । प्रकृतिको पुजा स्वरुप मंगलवार दग्नाममा भुमे पुजा पर्वको अवसरमा दुई गाउँका स्थानियले मुन्का डाँडामा ध्वजा पतकाले सिंगारिएको बाँसको लिङ्गो प्रतिस्पर्धा गराएको जनता मावि दग्नामका प्रधानध्यापक गुन पुनले बताउनुभयो ।

दग्नाम गाउँदेखि माथि शिरमा रहेको डाँडामा निकै रोचक तवरले आयोजित लिङ्गो जुधाइको अबलोकनका लागि गाउँदेखि टाढा तथा प्रवासमा रहेका दग्नामबासी लगायत अन्य छिमेकी गाउँका सर्वसाधारणको समेत बाख्लो उपस्थिति रहेको थियो ।

स्थानिय पुख्यौली गित, नृत्य, पञ्चेवाजाको रमाईलो उत्सवका विच स्थानियले मंगलवार विहान भुमे देवताको पुजा गरेपछी दिउँसो भुमे देवतालाई खुसी बनाउनका लागी लिङ्गो जुधाएको दग्नाका वडा अध्यक्ष एक बहादुर गर्वुजाले जानकारी दिनुभयो ।“यो हाम्रो संस्कृति हो, यसले दग्नामको पहिचान बोकेको छ, परम्परादेखि चल्दै आएको लिङ्गो जुधाउने प्रतियोगितालाई निरन्तरता दिन हामी लागीरहन्छौँ ’’– उहाँले भन्नुभयो । ” केही बर्ष अगाडि सम्म दुई गाउँबिच प्रतिष्ठालाई बढवा दिएर लिंगो जुधाउने गरिने भएपनि पछिल्लो समय भने रमाइलो, खुसियाली र भावनात्मक प्रतिस्पर्धाको रुपमा लिङ्खो जुधाउने गरिएको छ ।

जेठा भुमेको रुपमा चिनीने भएकाले दग्नामबासीले हरेक बर्षको जेष्ठ महिनामा बर्षभरिको खेतीबालि राम्रो होस, बाढि, पहिरो, भुक्षय जस्ता प्राकृतिक प्रकोपको सृजना नहोस, स्थानियबासीको सु–स्वास्थ्यको कामना गर्दै पुर्खौदेखी भुमे देवताको पुजा गर्दै आएका छन् । उक्त लिंगो जुधाई कार्यक्रममा स्थानीयबासी समेत रहनुभएका काँग्रेस जिल्ला सभापती खमवीर गर्वुजा, रघृुगंगा गाउँपालिकाका उपाध्यक्ष कमला तिलिजा लगायतको समेत उपस्थिति रहेको थियो ।

यसैबिच मंगलवार देखि नै दग्नामको चिनारी गितको समेत म्युजिक भिडियो छायांकन सुरु गरिएको छ । खिम गर्वुजाको शब्द सिर्जनामा गगन पुन र गिता पाईजाको स्वर रहेको उक्त गितको म्युजिक भिडियोमा विवेक थपाको निर्देशन रहेको छ ।