विकास निर्माणमा सकरात्मक कार्य : पदमार्ग निर्माणमा लक्ष्यभन्दा बढी काम

५२ वटा पक्की पिल्लर र १०० मिटर रेलिङ बनाउने सम्झौता भएपनि जनसहभागिता जुटाएर त्योभन्दा बढी काम गरेको उपभोक्ता समितिका अध्यक्ष निलप्रसाद पुनले बताउनुभयो । ५८ वटा पिल्लर ठडाएर १२० मिटर रेलिङ निर्माण गरिएको हो । गाउँपालिकाको रु पाँच लाख ४० हजार अनुदान र उपभोक्ताको रु ७८ हजार २०० बराबरको श्रमदानमा रेलिङ बनाइएको हो ।

पदमार्ग निर्माणका लागि ६३ घरधुरीले एक दिनका दरले श्रमदान गरेका छन् । “उपभोक्ताको श्रमदान जुटाएर तोकिएको गुणस्तरको अनुसार लक्ष्यभन्दा बढी काम गरेका हाै” अध्यक्ष पुनले भन्नुभयो । विकास योजनामा तोकिएको भन्दा कम गुणस्तर र परिणामको काम गरेर बढी मूल्यांकन गराउने, कमिशन खाने बेथिति मौलाइरहेको अवस्थामा दोसल्लेका बासिन्दाले नमूना काम गरेका गाउँपालिकाका उपाध्यक्ष केशमाया मगरले बताउनुभयो ।

अक्करे भिरको पदमार्गको डिलमा पक्की पिल्लर ठडाएर फलामले बारेको रेलिङ बनाएपछि सुरक्षितरुपमा आवतजावत गर्न पाएका छन् । यसअघि स्थानीय एक व्यक्तिले निजी लगानीमा करीब ५०० मिटर ढुंगाको सिढीसहितको पदमार्ग बनाएका थिए । पदमार्गमा रेलिङ निर्माण भएपछि दोसल्लेका बासिन्दा र तिप्ल्याङको कालिका आधारभूत विद्यालयमा अध्ययन गर्न आउने जाने विद्यार्थीलाई सहज भएको छ ।