म्याग्दी उद्योग वाणिज्य संघ मंगला इकाईको सभापतिमा पाण्डे

सन्दीप खत्री
म्याग्दी उद्योग वाणिज्य संघ मंगला गाउपाँलिका इकाइ समितिको सभापतिमा हुमनाथ पाण्डे निर्वाचित भएका छन् । शनिबार सम्पन्न मंगला गाउँपालिकाका उद्योगी व्यापारीहरुको भेलाले पाण्डेको नेतृत्वमा १७ सदस्य गाउँपालिका स्तरिय इकाई कमिटि सर्वसम्मत रुपमा चयन गरेको हो । इकाईको उपसभापतिमा चक्रलाल पाण्डे, सचिवमा प्रेमलाल पौडेल, कोषाध्यक्ष शोभा केसी, सहसचिवमा प्रमानन्द विश्वकर्मा निर्वाचित भएका छन् ।

त्यसैगरी इकाईको सदस्यहरूमा रामचन्द्र पौडेल, तिलक प्रसाद पुन, होमप्रसाद सुबेदी, मोतिलाल शर्मा, भुपेन्द्र जुग्जाली, भिम बहादुर किसान, भुपेन्द्र केसी, धन कुमारी पौडेल, बेल बहादुर केसी, पूर्ण बहादुर रोका, गंगालाल विश्वकर्मा र एक सदस्य अर्को बैठकले समिति चयन गरिएको छ । संघीय संरचना अनुसार संस्थाको संठनलाई विस्तार गर्नका लागि गाउँपालिका स्तरिय इकाई गठनमा जोड दिइएको म्याग्दी उद्योग वाणिज्य संघका अध्यक्ष उत्तम कर्माचार्यले बताए ।

कार्यक्रमको उद्घाटन गर्दै मंगला गाउँपालिका प्रमुख सतप्रसाद रोकाले समृद्ध मंगला गाउँपालिका निर्माणको लागि इकाइले महत्वपूर्ण भूमिका निर्वाह गर्ने विश्वास व्यक्त गरे । उनले भने–“गाउँपालिकामा भएका कच्चा पदार्थहरुको प्रयोग गरी गाउँपालिकाको विकासका लागि इकाईले भूमिका खेल्नेछ । बजारबाट सामान बोकेर आएका गाडि अब खालि होईन मंगला गाउँपालिकामा भएका कच्चा पदार्थ बोकेर जाने वातावरण तयार गर्नुपर्छ ।” मंगला गाउँपालिका लघुउद्यमको प्रशस्त सम्भावना भएको भन्दै उनले इकाइलाई त्यतातर्फ पनि ध्यान दिन आग्रह गरे ।

कार्यक्रममा नेपाल उद्योग वाणिज्य महासंघ प्रदेश नं ४ का सदस्य तथा पूर्व अध्यक्ष कुविर कुमार श्रेष्ठ, मंगला गाउँपालिका उपाध्यक्ष सिर्जना केसी, मंगला गापा–२ का वडा अध्यक्ष धन बहादुर खाती, नेकपा एमालेका नारायण बहादुर अधिकारी, नेपाली कांग्रेसका जितेन्द्र पुन, नेकपा माओवादी केन्द्रका चन्द्र बहादुर बुढा, म्याग्दी उद्योग, व्यवसायीको तर्फबाट होमनाथ पाण्डे, संघ संस्थाको तर्फबाट गरिमा विकास बैंकका बावियाचौर शाखा प्रमुख रविन सेठ लगायतले कार्यक्रममा बोल्दै मंगलामा इकाई खोलेर व्यवसायीहरुको पीर मर्का बुझ्न र गाउँपालिकाले निर्माण गर्ने व्यवसायीको नीति निर्माणमा सहज हुने भन्दै खुसी व्यक्त गरे ।

कार्यक्रममा म्याग्दी उद्योग वाणिज्य संघका प्रथम उपाध्यक्ष सुविन श्रेष्ठ, द्धितिय उपाध्यक्ष राजेश शाक्य संघका पदाधिकारीका, मंगला गाउँपालिकाका उद्योग ब्यापारीको उपस्थिती रहेको थियो । संघका अध्यक्ष उत्तमकुमार कर्माचार्यको अध्यक्षता, वरिष्ठ उपाध्यक्ष बेलबहादुर कटुवालको स्वागत र सञ्चालन महासचिव लिलाराम गौतमको सञ्चालनमा कार्यक्रम सम्पन्न भएको थियो ।