मुस्ताङमा बाम गठबन्धनका उमेद्वारको गाडी तोडफोड

मुस्ताङ, २ मंसिर । मुस्ताङको बाह्गाउँ मुक्तिक्षेत्र गाउँपालीकाको कागबेनीमा शुक्रबार साँझ बाम गठबन्धनका उमेद्वारले चुनाव प्रचारमा प्रयोग गरेको सवारी साधन तोडफोड भएको छ ।

कागबेनीको होटल ड्रागन अगाडी रोकेर राखिएको ग १ ञ ३९६ नम्बरको ल्याडक्रुजर गाडीको अगाडीको भागको सिसा तोडफोड भएको हो । सो गाडी प्रतिनिधिसभाका एमालेका उमेद्वार प्रेम तुलाचनले चुनाव प्रचारमा प्रयोग गर्दै आउनुभएको थियो ।
तुलाचन, एमाले मुस्ताङका अध्यक्ष चन्द्रमोहन गौचन, नेता श्रीमाया थकाली, टासी साङ्वो गुरुङसेनी, माओवादी केन्द्रका जिल्ला अध्यक्ष सत्यनारायण शेरचन र गाउँपालीका ईञ्चार्ज सुकबहादुर बिक कार्यकर्ता भेटघाटमा व्यस्त रहेको अवस्थामा गाडी तोडफोड भएको हो । जिल्ला प्रहरी कार्यालय मुस्ताङका प्रहरी नायव उपरिक्षक रामहरी पाण्डेले घटनामा संलग्नको खोजी भैरहेको बताउनुभयो ।