जोमसोममा अन्तराष्ट्रिय हिउँ चितुवा दिवस मनाइयो

मुस्ताङ, ६ कात्तिक । लोपोन्मुख अवस्थामा रहेको बन्यजन्तु हिउँ चितुवाको संरक्षणका लागि सन्देश प्रवाह गराउने उद्देश्यले सोमबार अन्तराष्ट्रिय हिउँ चितुवा दिवस मनाइएको छ ।

स्नो लियोपार्ड कन्सरभेन्सी, ग्लोबल प्राईमेट नेटवर्क र राष्ट्रिय प्रकृति संरक्षण अन्तरगतको अन्नपूर्ण संरक्षण क्षेत्र आयोजना –एक्याप)को आयोजनामा जिल्लामै पहिलो पटक दिवस मनाइएको हो । हरेक वर्षको २३ अक्टोबरका दिन अन्तराष्ट्रिय हिउँ चितुवा दिवस मनाउने गरिन्छ ।

“मुस्ताङ जिल्लाको एकता, हिउँ चितुवा जोगाउने प्रतिबद्धता“ भन्ने मुल नाराको साथमा विद्यार्थी, शिक्षक, स्थानीय बासिन्दा, सुरक्षाकर्मी र संरक्षणकर्मीहरुको सहभागीतामा र्‍यालीमाको आयोजना गरिएको थियो ।