बाला चतुर्दशी पर्वमा गलेश्वर शिवालयमा भक्तजनको घुइँचो (तस्बिर/भिडियो)

म्याग्दी , ३ मङ्सिर । म्याग्दीको बेनी नगरपालिका–९ गलेश्वरमा अवस्थित गलेश्वर शिवालय मन्दिरमा बाला चतुर्दशी पर्वको अवसरमा शतबीज छर्न आएका भक्तजनहरुको घुइँचो लागेको छ । गयरातीदेखि नै शिवालय मन्दिरमा महाबत्ती र अखण्डबत्ती बालेर भजनकृतन गाएर जाग्राम बसेका भक्तजनहरुले विहान कालीगण्डकी नदीमा स्नान गरेर शतबीज छर्न थालेको गलेश्वर शिवालय क्षेत्र विकास कोषका अध्यक्ष माधव प्रसाद रेग्मीले जानकारी दिनुभयो । उहाँका अनुसार, विहानैदेखि भक्तजनहरुको आगमन बढ्दै गएको छ ।

 

बाला चतुर्दशी पर्वको अवसरमा गलेश्वरधाममा परम्परागत रुपमा शतबीज छर्ने मेला लाग्दै आएको छ । गलेश्वर शिवालय क्षेत्र विकास कोषले मुल समिति र विभिन्न उपसमितिहरु मार्फत सहज रुपमा भक्तजनहरुलाई कालीगण्डकी नदीमा स्नान गरी शतबीज छर्ने र मन्दिरमा दर्शन तथा पूजाआजा गर्ने प्रवन्ध मिलाईएको छ । भक्तजनहरुको शान्ति, सुरक्षा र सहजिकरणका लागि सुरक्षाकर्मी र स्वंयसेवकहरु परिचालन गर्ने तयारी गरिएको छ । विश्वमा एकमात्रै शिला पाईने कालीगण्डकी नदीमा स्नान गर्न आएका तिर्थालुहरुको नदीमा हुनसक्ने सम्भावित जोखिमलाई ध्यानमा नदी किनारमा समेत शसस्त्र प्रहरीको टोली परिचालन भएको छ ।

गलेश्वर शिवालयमा म्याग्दी, पर्वत, बागलुङ, कास्की, तनहुँ,झापा, भैरवा, चितवन लगायत देशका विभिन्न ठाउँबाट गलेश्वरमा शतबीज छर्नका लागि भक्तजनहरु आएको कोषका अध्यक्ष रेग्मीले बताउनुभयो । परापूर्वकालदेखि नै गलेश्वर शिवालयमा बाला चतुर्दशी पर्वको अवसरमा सतबीज छर्ने परम्परा र संस्कृति रहेको र सतबिज छर्दा पितृहरुको उद्धार भइ पुन्य लाभ हुने जनविश्वास रहेको पर्वतको पाङबाट शतबीज छर्न आउनुभएका कपिलामणी शर्मा बास्तोलाले बताउनुभयो ।

हरेक वर्ष मङ्सिर कृष्ण चतुर्दशीका दिन भगवान शिवजीलाई खुसी बनाउन जौ, धान, तिल, गहुँ, तोरी, मास, केराउ, लावा, मुला, ज्यामिर, उखु, सखरखण्ड, पिँडालु लगायतका सय जातिका अन्न तथा कन्दमुलहरु शतबीजका रूपमा छर्ने गरिन्छ । शतबीज छर्नाले भगवान शिबजी खुसी खुसी र अर्को जुनीको लागि खेती हुने भएकाले यसको धार्मिक र शास्त्रीय महत्व रहेकोे गलेश्वर धाममा शतबीज छर्न आउनुभएका भक्तजन तिर्थलाल शर्माले बताउनुभयो ।

शतबीज छर्नाले मृतकले जीवित अवस्थामा गरेका सम्पूर्ण पाप नाश हुने जनविश्वास समेत रहेको छ । गलेश्वरधाममा लाग्ने धार्मिक मेलाहरुमध्ये बाला चतुर्दशीमा शतबीज छर्ने मेलालाई महत्वका साथ लिने गरिन्छ । यस बर्ष बाला चतुर्दशी पर्वमा गलेश्वरमा करिब ३० हजार भक्तजनहरु आउने अनुमान गरिएको छ । कालीगण्डकी नदी किनारमा एउटै नौ रोपनी चक्रशिलामा अवस्थित गलेश्वर शिवालय मुक्तिनाथ प्रवेशद्धारको रुपमा रहेको छ भने विश्वकै अलौकिक तिर्थस्थलको रुपमा समेत परिचित छ ।