कुइनेखानीको कोसेरा खोलामा पुल निर्माण भएपछि स्थानीयलाई सहज

म्याग्दीको रघुगंगा गाउँपालिका–८ को दुर्गम बस्ती कुइनेखानी गाउँको कोसेरा खोलामा पुल निर्माण भएको छ । मुल गाउँ जाने बाटोमा पुल नहुँदा खोलाबाटै वारपार गर्नुपर्ने बाध्यता ट्रस प्रविधिको स्टिल पुल निर्माण भएपछि हटेको छ ।
३२ मिटर लामो पुलबाट रघुगंगाका कुइने गाउँका करिब एक सय घरधुरी लाभान्वित भएका छन् । रू ३३ लाख २४ हजार हजार १६७ लागतमा पुल निर्माण भएको पुल निर्माण उपभोक्ता समितिका सचिव इश्वर छन्त्यालले जानकारी दिनुभयो ।
उहाँका अनुसार, संघिय सरकारको झुलुङ्गेपुल क्षेत्रको ८५ प्रतिशत, रघुगंगा गाउँपालिकाको १२ प्रतिशत र स्थानीयको दुई प्रतिशत जनश्रमदान र मिलन म्याग्दीको प्राविधिक सहयोगबाट उक्त पुल निर्माण भएको हो ।
पुल नहुँदा बर्खामा जोखिमपूर्ण यात्रा गर्नुपर्ने बाध्यता पुल निर्माण भएपछि हटेको निर्माण उपभोक्ता समितका अध्यक्ष दिनेश छन्त्यालले बताउनुभयो । उहाँले पुल निर्माण भएपछि खोलामा वारपार गर्नुपर्ने यात्रा सुरक्षित र भरपर्दो बनेको जानकारी दिनुभयो ।
नवनिर्मित पुलको शुक्रवार एक समारोहका बिच उद्घाटन गरिएको छ । पुल उद्घाटन गर्दै गाउँपालिका अध्यक्ष भब बहादुर भण्डारीले स्थानीयवासीको आवश्यकता र मागलाई प्राथमिकता दिएर पुल निर्माण गरेको बताउनुभयो ।
कार्यक्रममा गाउँपालिकाका प्रवत्ता एवं वडा नम्बर ६ का अध्यक्ष मनकुमार शरपुञ्जा, मिलन म्याग्दीका प्रतिनिधि तथा प्राविधिक याम बहादुर विश्वकर्माले मन्तव्य राख्नुभएको थियो ।