पत्रकार बूढामगरलाई ज्यानमार्ने धम्की

धु्रवसागर शर्मा
म्याग्दी २३ कार्तिक । बागलुङका सक्रिय पत्रकार एवम् नेपाल प्रेस युनियन बाग्लुङका सदस्य डम्मर बूढामगरलाई एक अज्ञात व्यक्तिले ज्यान मार्ने धम्की दिएको छ । स्पोर्ट नेपाल नामको फेसबुक आइडीबाट पत्रकार बूढामगरलाई अश्लिल गाली गलोज सहित ज्यान मार्ने धम्की आएको पत्रकार बूढाथोकीले बताए ।

गत शुक्रवार राती म्यासेन्जरमा अश्लिल गाली सहित ज्यान मार्ने धम्की आए पछि पत्रकार बूढामगरले प्रहरीमा उजुरी गर्नुका साथै साइबर व्युरोमा समेत उजुरी दिएको जानकारी दिए । व्यक्तिगत रुपमा आफ्नो शत्रु नभएका र धम्कीमा समाचारको विषय पनि नखुलाइएकोले कुन प्रयोजनका लागि धम्की आएको हो भन्नेकुरा खुल्न नसकेको पत्रकार बूढामगरले जानकारी दिएका छन् । बगलुङको निसिखोला गाउँपालिका वडा नं ४ स्थायी घर भएका बूढामगर विगत ५ वर्षदेखि बागलुङ बजारमा वसेर पत्रकारिता गरिरहेका छन् ।

आफूले लेखेका समाचारहरु विशेषगरी विकास निर्माण र खोजमूलक हुनेभएकोले समाचारको विषयमा कसैले पनि आपत्ति गर्नु पर्ने ठाउँ नरहेको हुँदा समाचारको विषयमा नभइ अन्य कुनै प्रयोजनका लागि धम्की दिइएको हुनसक्ने पत्रकार बूढामगरले बताए ।
जिल्लामा रहेर निश्पक्षरुपमा पत्रकारिता गर्दा ज्यानै लिनेसम्मका धम्की आएपछि असुरक्षित महशुस भएको पत्रकार बूढामगरको भनाइ छ । सम्वन्धित निकायले धम्कीदिने व्यक्तिको खोजी गरी कारवाही गर्न उनले माग गरेका छन् । पत्रकार बूढामगर रासस,थाहा खबर,नेपाल नेटवर्क टेलिभिजन लगाएतका संचारमाध्मयमा कार्यरत छन् ।