एमालेबाट बेनी– ८ को वडाअध्यक्ष उम्मेदवारमा कर्माचार्य

 

म्याग्दी, २९ चैत । आगामी बैशाख ३० गते हुने स्थानीय तहको निर्वाचनमा नेकपा एमालेले बेनी नगरपालिका वडानम्वर ८ मा उत्तम कुमार कर्माचार्यलाई वडा अध्यक्षको उम्मेदवार बनाएको छ । आइतवार बसेको वडा कमिटीको बैठकले कर्माचार्यलाई सर्वसम्मत रुपमा अध्यक्षको उम्मेदवार सर्वसम्मत निर्णय गरेको हो ।

कर्माचार्य नेकपा एमाले जिल्ला कमिटी सदस्य हुनुहुन्छ । म्याग्दी उद्योग वाणिज्य संघका निवर्तमान अध्यक्ष समेत रहनुभएका कर्माचार्य जिल्लाका स्थापित व्यवसायी हुनुहुन्छ । हालको वडा अध्यक्ष रामकृष्ण बराईली र वडा कमिटी अध्यक्ष ठाकुरप्रसाद शर्माले पनि कर्माचार्यलाई नै समर्थन गर्नुभएको थियो । अध्यक्ष बाहेकका अरु सदस्यहरुको भने टुङ्गो लगाईएको छैन ।

सवै टोल र समुदायको प्रतिनिधित्व हुने गरि सदस्यका लागि उम्मेदवार छनौट गर्न लागिएको वडा कमिटी अध्यक्ष शर्माले बताउनुभयो । वडाको चौतर्फी विकासका लागि आफुले उम्मेदवारी घोषणा गरेको कर्माचार्यले बताउनुभयो । वडा नं ८ मा नेपाली काँग्रेस र नेकपा माओबादीले यसअघिनै उम्मेदवार चयन गरिसकेको छ ।

काँग्रेसबाट हालको वडा सदस्य समेत रहनुभएका हिम बहादुर भण्डारी र माओवादीबाट किसान विश्वकर्माले वडा अध्यक्षको उम्मेदवारी घोषणा भएको छ ।