मुस्ताङमा “लुकेको हिरा“ विमोचन सम्पन्न

प्राकृतिक सौन्दर्यले भरिपर्ण हिमाल पारीको जिल्ला मुस्ताङको घरपझोङ गाउँपालिका वडा नं. ५, ठिनी स्थित जन मुक्ति युवा क्लबले प्रकाशन गरेको “लुकेको हिरा“ स्मारिकाको शनिबार विमोचन गरिएको छ ।
सांसद श्री माया थकालीले उक्त स्मारिका विमोचन गरेकी हुन् । स्मारिका विमोचन गर्दै प्रमुख अतिथि थकालीले लुकेको हिराका रुपमा रहेको ठिनीलाई बाहिर ल्याउनु पर्ने बताईन् । विभिन्न कठिन परिस्थतिका वीच क्लव स्थापनको अवस्थालाई स्मरण गर्दै थकालीले सोही क्लवले प्रकाशन गरेको स्मारिका आफूले विमोचन गर्न पाउँदा हर्षित भएको बताईन । कठिनाई बाबजुत क्लब भवन निर्माण, क्लबको आम्दानी स्वरूप केवल टि भि., ट्रांस्लेसन जडान आफ्नै पालामा बनाएको र

अहिलेको क्लबका पदाधिकारीहरुले व्यवस्थापन गरेको देख्दा एकदमै खुसि भएको भन्दै क्लबका भूतपूर्व अध्यक्ष सन प्रसाद थकालीले प्रसन्नता व्यक्त गरे । स्मारिका विमोचन कार्यक्रममा नव निर्वाचित वडा अध्यक्ष विरेन्द्र थकालीले गाउँको हरेक विकास कार्यमा क्लबका युवाहरुसंग हातेमालो गरि अगाडि बढ्ने बताए ।

धेरै चुनौतीहरुलाई पन्छाउदै हरेक विकास पूर्वाधारहरुलाई अगाडी बढाउने र “लुकेको हिरा“ स्मारिका प्रकाशनलाई निरन्तरता दिने क्लवका अध्यक्ष नरेन्द्र थकालीले बताए । स्मारिका प्रकाशनमा विज्ञापन, लेख रचना तथा जानकारीहरु पलब्ध गराउने रचनाकार तथा लेखकहरुलाई अध्यक्ष थकालीले धन्यवाद ज्ञापन गरेका छन् । क्लवका अध्यक्ष नरेन्द्र थकालीको अध्यक्षता र क्लबका उपाध्यक्ष महेश थकालीको सञ्चालनमा सम्पन्न कार्यक्रममा घरपझोङ र ठिनीको इतिहासको बारेमा प्रकाश पार्दै स्मारिका प्रकाशने प्रमुख उद्देश्य सहित क्लबका सचिव तथा स्मारिकाका सम्पादक निरज थकालीले स्वागत मन्तब्य दिएका थिए ।

१२ वर्षमा आउने १२ वर्षे देवी दर्शनको अवसर पारेर स्मारिका प्रकाशन गरिएको हो । साथै सोही कार्यक्रमको अवसरमा एसइइ २०७३ मा ठिनी गाउमा उत्कृष्ट अंक ल्याउने पाल्साङ गुरुङ र दलित जेहेन्दारमा सुनिता बि.क. लाई क्लबद्वारा रु.५०००।– हजारका दरले छात्रवृत्ति प्रदान गरिएको थियो । त्यसैगरि क्लवको आयोजनामा सम्पन्न थकाली भाषा प्रशिक्षण कार्यक्रममा मुख्य प्रशिक्षकको कर्ण थकालीलाई समेत सम्मान गरिएको थियो । कार्यक्रममा बक्ताहरुले स्मारिको निरन्तरताको शुभकामना दिएका थिए । त्यसैगरि नव वडा नं. ५ ठिनीका सम्पूर्ण जनप्रतिनिधिहरुलाई समेत क्लवले सम्मान गरेको छ । स्मारिका विमोचन कार्य नव निर्वाचिन जनप्रतिधिहरु, गाउँमुखिया र आमा समूहका पदाधिकारीहरु र गाउँका भद्रभलादमीहरुको वशेष उपस्थिति रहेको थियो ।