भुरुङ तातोपानीमा धौलागिरि क्षेत्रकै ठुलो होटल निर्माण हुँदै (भिडियो)

म्याग्दी २३ मंसिर । म्याग्दीको अन्नपूर्ण गाउँपालिका–२ भुरुङ तातोपानीमा धौलागिरि क्षेत्रकै ठुलो होटल निर्माण हुन लागेको छ । म्याग्दी सदरमुकाम बेनीमा व्यवसाय गर्दै आउनुभएका राजु हमालले रु २५ करोड लगानीमा ५७ कोठा क्षमताको ‘होटल नेचुरल स्प्रिङ प्रा.लि.’ सञ्चालनमा ल्याउन लाग्नुभएको हो । रोयल, डिलक्स र साधारण गरि तीन स्तरका सुविधा सहितको कोठाहरुको व्यवस्था सहित होटल निर्माण गरिरहेको हमालले बताउनुभयो ।

करिब ८ रोपनी क्षेत्रफलमा ६ तलाको भवन निर्माण भैरहेको छ । होटलको भौतिक पूर्वाधारतर्फको करिब ६५ प्रतिशत काम पुरा भएको र आगामी भदौदेखि औपचारिक रुपमा सञ्चालनमा ल्याउने तयारी गरिएको उहाँको भनाई छ । होटलमा पार्किङ र लिफ्ट सुविधा संगै १५० जना क्षमताको सेमिनार हल, मसाज, क्याफे र लोकलमार्ट समेत सञ्चालनमा आउनेछन् ।

होटल सञ्चालनमा आएसंगै पहिलो चरणमा ४० जनाले नियमित रोजगार पाउने सञ्चालक हमालले जानकारी दिनुभयो । रु २२ करोड लागत अनुमान गरिएको भएपनि कोरोना महामारीको कारण सामानमा भएको अभाब , निर्माण कार्यमा भएको प्रभाब र सामान ढुवानीमा भएको असुविधाले लागत बढ्ने भएको हमालले बताउनुभयो । ‘‘ क्षमताको हिसाबले धौलागिरि क्षेत्रकै ठुलो हुन्छ, सुविधामा समेत स्टार होटलका सुविधा उपलब्ध गराउँछौँ, सुविधायुक्त होटललले यस क्षेत्रको पर्यटन प्रवद्र्धनमा समेत सघाउने अपेक्षा गरेको छु’’–उहाँले भन्नुभयो ।

पोखरादेखि कुस्मा, बेनी हुँदै हिमाल पारिको जिल्ला मुस्ताङ जाने एकमात्रै सडक बेनी–जोमसोम–कोरला सडकमा पर्ने भएकाले होटल सञ्चालनमा आउन कसे यस सडकखण्ड हुँदै आवत जावत गर्ने आन्तरिक तथा बाह्य पर्यटकहरुको बसाई लम्बाउन टेवा पु¥याउने अपेक्षा गरिएको स्थानीय पर्यटन व्यवसायि समेत रहनुभएका अन्नपूर्ण गाउँपालिकाका कार्यपालिका सदस्य आत्मा तुलाचनले बताउनभयो ।

 

‘‘ यहाँको प्राकृतिक तातोपानीको कुण्ड पर्यटकहरुको रोजाईमा पर्ने गरेको छ, तर सिजनमा अहिले सञ्चालनमा रहेका होटलहरुले पर्यटकको चाप धान्न सक्ने अवस्था छैन्, त्यसैले ठुलो क्षमतामा सञ्चालनमा ल्याउन लागिएको यस होटलले पर्यटकहरुको बसाई व्यवस्थापन र भ्रमण अवधि बढाउन सहयोग पुग्ने देखिन्छ’’– तुलाचनले भन्नुभयो । तातोपानीमा अहिले ठुला ७ र साना १५ होटलमा ४ सय जनासम्म पर्यटकहरु बस्न सक्ने क्षमताका होटलहरु छन् । अन्नपूर्ण राउण्ड पदमार्ग र मुस्ताङ जाने एक मात्रै बेनी–जोमसोम सडकखण्डले समेटिएको ठाउँ भएकाले तातोपानीमा सञ्चालनमा आउन लागेको यस होटलले पर्यटकहरुलाई आरामदायि बसोबासको प्रवन्ध मिलाउन र पर्यटन प्रवद्र्धनमा सघाउने स्थानीयबासीको भनाई छ ।