सडकबाट खसेर दुई जना वेपत्ता

म्याग्दी २४ भदौ । बेनी–जोमसोम सडक अन्तरगत म्याग्दीको दाना काभ्रे भिर र भुरुङ तातोपानीमा सडकबाट खसेर २ जना वेपत्ता भएका छन् ।अन्नपूर्ण गाउँपालीका ३ दानाको काभ्रे भिर स्थित सडकबाट खसेर शनिबार दिउँसो एक भारतीय तिर्थयात्री र अन्नपूर्ण २ भुरुङ तातोपानीको भिरबाट मोटरसाईकल सहित खसेर अर्का एक नेपाली वेपत्ता भएका प्रहरीले जनाएको छ ।

सडक बिस्तार भैरहेकाले गाडी रोखिएको अवस्थामा झरेर पैदल हिडेर घाँसातर्फ जाँदै गरेका भारतको बिहारका ललन शर्मा खोचमा सडकको डिलबाट खोचमा खसेका हुन् । शर्माले लगाएको गलबन्दि भिरमा अड्कीएको अवस्थामा देखिएको र उनको खोजीमा प्रहरी परिचालन भएको घटनास्थलबाट ईन्द्रसिङ शेरचनले बताउनुभयो ।

यसैगरी शुक्रबार भुरुङतातोपानी देखि बेनी तर्फ आउँदै गरेको मोटरसाईकल सहित कालीगण्डकी नदीमा खसेर हेटौडा उपमहानगरपालीका १६ का अन्दाजी २४ वर्षिय बादल बम्जन बेपत्ता भएका छन् । ग १२ प ५३४ नम्बरको मोटरसाईकल चढेर बेनी आउँदै गरेका उनी भुरुङ तातोपानीको भिरबाट कालीगण्डकी नदीमा खसेका थिए ।

बम्जनको खोजी जारी रहेको र भेटाउन नसकेको भुरुङ तातोपानी प्रहरी चौकीले जनाएको छ । अगाडी जाने क्रममा डिलबाट खसेका उनको गलबन्दि भिरमा अड्कीएको अवस्थामा देखिएको घटनास्थलबाट ईन्द्रसिङ शेरचनले जानकारी दिनुभयो ।