२३ औं जेसीजकप फुटबलको उपाधी केवि एकेडेमीलाई

म्याग्दी ,१३ मङ्सिर । म्याग्दी सदरमुकाम बेनीमा शनिवार सम्पन्न २३ औँ अन्तर मा.वि. जेसीजकप फुटवलको उपाधि केवि एकेडेमी दरबाङले हात पारेको छ । बेनीको खुलामञ्चमा भएको प्रतिस्पर्धात्मक फाइनल खेलमा बेनी सामुदायिकमाविलाई १ का विरुद्ध ३ गोल गर्दै केवि एकेडेमीले उपाधी चुमेको हो ।
केवि एकेडेमीले पहिलो पटक जेसीजकपको उपाधी हात पारेको हो । यस अघि १७ औँ जेसीज कपमा उपबिजेतामा चित्त बुझाएको केवि एकेडेमीले २३ औँ संस्करणमा उपाधी जित्न सफल भएको हो । सेमिफाइनलमा किसानी चन्द्राकुन्ता माविलाई शुन्यका विरुद्ध एक गोल गर्दै बेनी सामुदायिक र लिटल गार्डेन एकेडेमीलाई पेनाल्टी सुटआउटमा एकका विरुद्ध चार गोल गर्दै केवि एकेडेमी फाइनल प्रवेश गरेका थिए ।

विभिन्न १९ विद्यालयले सहभागिता जनाएको प्रतियोगितामा प्रथम हुन सफल केवि एकेडेमीका विद्यार्थी खेलाडीहरुलाई रनिङ शिल्डसहित ट्रफी, मेडल, प्रमाणपत्र सहित नगद रु ५५ हजार पाँच सय ५५ र उपबिजेता बेनी सामुदायिक माविका विद्यार्थी खेलाडीहरुलाई ट्रफि, मेडल र प्रमाणपत्र सहित नगद रु ३५ हजार पाँच सय ३५ द्धारा पुरस्कृत गरिएको छ
प्रतियोगितामा लिटल गार्डेन एकेडेमिका इशान सुवेदी राइजिङ प्लेयर, बेनी सामुदायिक माविका साइरेश पुन उत्कृष्ट डिफेन्डर,केवि एकेडेमीका मौसम रोका उत्कृष्ट मिडफिल्डर, बेनी सामुदायिक माविका सन्दिप क्षेत्री उत्कृष्ट स्ट्राइकर, केवि एकेडेमीका सञ्जन घर्ति उत्कृष्ट गोलरक्षक घोषित हुनुभएको छ भने प्रतियोगिता अवधिमा ५÷५ गोल गर्न सफल केवि एकेडेमीका खिमबहादुर थापा, माउण्ट एभरेष्टका सज्जन थजाली र लिटल गार्डेन एकेडेमिका एलिन जुग्जाली सर्वाधिक गोलकर्ता घोषित हुनुभएको छ । उत्कृष्ट कोचको पुरस्कार केवि एकेडेमिका टण्डीन लामालाई प्रदान गरिएको छ ।
उत्कृष्ट खेलाडी, सर्वाधिक गोलकर्ता, उत्कृष्ट गोलरक्षक, उत्कृष्ट स्ट्राइकर, उत्कृष्ट डिफेन्डर, उत्कृष्ट मिडफिल्डर, राइजीङ प्लेयर, उत्कृष्ट प्रशिक्षकलाई नगद रु २ हजार पाँच सयसहित ट्रफिद्धारा पुरस्कृत गरिएको र अनुसासित टिम घोषित निस्कोट माविलाई नगदरु रु ५ हजार सहित सहित सम्मान गरिएको प्रतियोगिताका संयोजक नविन पौडेलले जानकारी दिनुभयो । कार्यक्रममा गण्डकी प्रदेश सभा सदस्य हरिबहादुर भण्डारी, नेपाल जेसीजका राष्ट्रिय उपाध्यक्ष सन्दिप खत्री, म्याग्दी जेसीजका शाखा अध्यक्ष विनोद घर्ति लगायतले पुरस्कार वितरण गर्नुभएको थियो । खेलाडीहरुलाई पुरस्कार वितरण गर्दै गण्डकी प्रदेश सभा सदस्य भण्डारीले म्याग्दीमा फुटवल खेलको विकासमा जेसीजकपको भूमिका महत्वपूर्ण रहेको बताउँदै युवाहरुलाई खेलकुदले एकता र सहकार्यको भावनामा जोडिन भूमिका खेलेको चर्चा गर्नुभयो ।