बालदिवसको अवसरमा बाल लोकगित प्रतियोगिता आयोजना गरिने

म्याग्दी, २७ साउन ।जिल्ला बाल सञ्जाल म्याग्दीले यस वर्षको राष्ट्रिय बाल दिवसको अवसरमा बाल लोकगित प्रतियोगिताको आयोजना गर्ने भएको छ ।

सञ्चालको शुक्रबार बेनीमा बसेको बैठकले बालअधिकारको बारेमा सन्देश प्रवाहका साथै बालबालिकाको हक हितका लागि बनेका ऐन नियमको कार्यान्वयन, बालश्रम, बालबिवाहको बिरुद्धमा सचेतीकरण गर्ने उद्देश्यले प्रतियोगिताको आयोजना गर्ने निर्णय गरेको हो ।

भदौ २६ गते राष्ट्रिय बाल दिवसको अवसरमा आयोजना हुने प्रतियोगितामा म्याग्दी, बागलुङ, पर्वत र मुस्ताङका विद्यालयबाट सहभागीता हुने सञ्जालका उपाध्यक्ष थमप्रसाद आचार्यले जानकारी दिनुभयो ।

प्रतियोगिता सञ्चालनका लागि दुई लाख ४३ हजार रुपैयाको बजेट तयार गरेको छ । विभिन्न संघ, संस्था, सरकारी निकायको सहयोगमा प्रतियोगिता सञ्चालन गर्ने सञ्जालको योजना छ । सरोकारवालाहरुसंग छलफलका साथै प्रचारप्रसार, आर्थिक संकलन लगायतका तयारी तिब्र बनाइने सञ्जालकी रञ्जना श्रेष्ठले बताउनुभयो ।