बेनी–गलेश्वर सडकबाट कालिगण्डकीमा ट्याक्सी खसेपछि ……………….

म्याग्दी, १६ साउन । म्याग्दीको गलेश्वरदेखि बेनी आउँदै गरेको ध १ ज ३८३ नम्बरको ट्याक्सी कालिगण्डकी नदीमा खसेको छ । बेनी–गलेश्वर सडकखण्डको जलेश्वमा रहेको पहिरोको नजीकैबाट कालिगण्डकीमा खसेर ट्याक्सी दुर्घटना हुँदा सो ट्याक्सीमा सवार दुई जना घाईत भएका छन् ।

ट्याक्सीमा सवार धौलागिरी गाउँपालिका–७ ताकमका हरिप्रकाश थापा र उनका छोरा सुमित थापा घाईते भएको जिल्ला प्रहरी कार्यालयले जनाएको छ । दुर्घटनामा ट्याक्सी चालक समेत सामान्य घाईते भएका थिए ।

दुर्घटनामा परेका बाबु छोराको जिल्ला अस्पतालमा प्राथमिक उपचार पश्चात थप उपचारको लागि पोखरा रिफर गरिएको प्रहरीले जनाएको छ । उनीहरुको अबस्था खतरामुक्त रहेपनि थप उपचारको लागि पोखरा पठाईएको हो ।

कालिगण्डकीमा खसेको ट्याक्सीको अगाडीको भाग फुटेपछि सवार यात्रुहरु सोही ठाउँबाट बाहिर निस्कीएर ज्यान जोगाउन सफल भएका थिए । उनीहरु बाहिर निस्कीलगत्तै सो ट्याक्सीलाई नदीले बगाएर केही तल ल्याएको थियो । विपरित दिशाबाट तिब्र गतिमा आएको मोटरसाईकललाई साईट दिनेक्रममा ट्याक्सी दुर्घटनामा परेको बताइएको छ ।