एसइई परीक्षाः म्याग्दीमा दुई हजार दुई सय बढी विद्यार्थी

म्याग्दी ७ चैत । यस वर्षको माध्यमिक शिक्षा परीक्षा (एसइई) मा म्याग्दीबाट दुई हजार दुई सय १४ जना विद्यार्थी सहभागी भएका छन । चैत ७ देखि १९ गतेसम्म सञ्चालन हुने परिक्षाका लागि म्याग्दीमा नौ वटा परिक्षा केन्द्र तोकिएको छ । जिल्लाको पाँच गाउँपालिकामा १/१ वटा र बेनी नगरपालिकामा चार वटा परिक्षा केन्द्र निर्धारण गरी परिक्षा सञ्चालन गरिएको छ ।
म्याग्दीमा ६३ वटा सामुदायिक, ११ वटा संस्थागत, एक खुला विद्यालय र एक उज्यालो बैकल्पिक विद्यालयका विद्यार्थीहरुले एसइई परीक्षामा सहभागीता जनाएको शिक्षा विकास तथा समन्वय इकाई म्याग्दीका प्रमुख विदुर शर्मा चापागाईले जानकारी दिनुभयो । ज्ञानोदय माध्यमिक विद्यालयमा सञ्चालित दृष्टिविहिन स्रोत कक्षाका दुई जना सहित तीन जना फरक क्षमता भएका विद्यार्थीहरुले परीक्षामा सहभागी भएका छन् ।

परीक्षामा नियमित साधारणतर्फ एक हजार छ सय ८९ जना, ग्रेड बृद्धि साधारणतर्फ ४३१ जना , प्राविधिक नियमिततर्फ ७३ जना, प्राविधिक ग्रेडबृद्धितर्फ १७ जना र पुराना ग्रेडबृद्धितर्फ ४ जना विद्यार्थी सहभागी हुनेछन् । म्याग्दीमा गत बर्ष १ हजार ८ सय ३६ जनाले एसइई परिक्षामा सहभागी भएका थिए ।

म्याग्दीमा परिक्षा सञ्चालनका लागि सम्बन्धित परीक्षा केन्द्र रहने विद्यालयका प्रधानध्यापकलाई नै केन्द्राध्यक्ष तोकिएको र उनीहरुलाई आबश्यक तालिम र परामर्श दिएर निर्देशिका बमोजिमको जनशक्ति परिचालन गरी परीक्षालाई शान्त र मर्यादित तवरले सञ्चालन गर्ने व्यवस्था मिलाईएको इकाई प्रमुख चापागाईले बताउनुभयो ।

परीक्षा सञ्चालनको लागि १५० जना विद्यार्थी बराबर एक सहायक केन्द्राध्यक्ष, २० जना विद्यार्थी बराबर एक जना निरिक्षक, ५० जना विद्यार्थी बराबर एक जना सहयोगी कर्मचारीको व्यवस्था गरिएको छ ।