पदमार्गमा बेपत्ता दुईमध्ये एक पर्यटक खोलामा मृत भेटिए

अन्नपूर्ण पदमार्गमा आइतबारदेखि बेपत्ता दुई स्पेनिस पर्यटकमध्ये मंगलबार एक पुरुषको शव फेला परेको छ। महिला पर्यटकको अवस्था अझै अज्ञात छ। कास्कीको अन्नपूर्ण गाउँपालिका- ९ तिखेढुङ्गाबाट उल्लेरी हुँदै घोरेपानी जाने क्रममा आइतबार स्पेनी नागरिक वर्ष ३७ का इरिक सोलर कासानोभास र वर्ष ३२ की मर्स मोलास जुन्का बेपत्ता भएका थिए ।

आइतबार साझ ६ बजेतिर तिखेढुंगास्थित मौजाखोलानजिकै रहेको गोरेटो बाटोमा वेवारिसे अवस्थामा दुईवटा झोला भेटिएको थियो।

सुचना पाएपछि बिरेठाटीस्थित प्रहरी चौकीबाट खटिएको प्रहरीले सो झोला बिरेठाटी ल्याएको थियो । त्यसपछि वडा प्रहरी कार्यालय बगरबाट गएको टोली, अन्नपुर्ण ८ का वडा अध्यक्ष बिजय गुरुङ र एक्यापकाका प्रतिनिधी यमबहादुर गुरुङको रोहबरमा झोला खोली हेर्दा दुई जनाको पासपोर्ट, पोको कम्पनीको (स्क्रिन टच) मोवाईल एक थान, पासपोर्ट साईजको फोटो, विभिन्न कपडा, लगायतका सामानहरु दुईवटा झोलामा भेटिएका थिए ।

दुई पर्यटक बेपत्ता भएपछि बिरेठाँटीबाट पर्यटक प्रहरीसमेत सातजना र सशस्त्र प्रहरी नंम्बर २४ हेडक्वाटर मालेपाटनबाट सातजनाको टोली खटिई खोजतलास सुरु गरेको थियो ।

सोही क्रममा बेपत्ता दुईमध्ये कासानोभासको शव उनीहरु बेपत्ता भएको स्थानभन्दा करिव एक हजार पाँच सय मिटर तल अन्नपुर्ण ९ स्थित भुरुङ्दी खोलामा फेला परेको अन्नपुर्ण गाउँपालिकाका प्रवक्ता भरतमान गुरुङले जानकारी दिए ।

अर्का एकजनाको खोजतलासको काम भै रहेको गुरुङले बताए । ६ भदौमा  नेपाल आएका उनीहरु विरेठाँटीस्थित पर्यटक चेकपोष्टमा आईतबार अर्थात ९ भदौका दिन विहान १० बजेर २१ मिनेटमा नाम दर्ता गराएर कास्कीको उल्लेरी हुँदै म्याग्दीको घोरेपानी जाने भनी हिडेका थिए ।

सोमबार खोलाको छेउछाउमा खोजतलास गर्ने क्रममा टोपी एक थान, टिसर्ट एका थान, आल्मुनियमको स्टिक (लौरी) एक थान, जिपिएर एक थान र झरनाको फेदीमा दुई थान ट्रेकिङ स्टिकसमेत फेला परेको थियो ।