‘हेमबहादुर पुन मगर स्मृती अन्तर मावि लोकनृत्य प्रतियोगिता’मा बेनी बोर्डिङ प्रथम

 

म्याग्दी, १५ फागुन । सदरमुकाम बेनी स्थित बेनी बोर्डिङ स्कुलले ‘हेमबहादुर पुन मगर स्मृती अन्तर मावि लोकनृत्य प्रतियोगिता’को उपाधी जित्न सफल भएको छ । नेपाल मगर संघको जिल्ला समन्वय समितिको आयोजनामा सोमबार म्याग्दी सदरमुकाम बेनीमा सम्पन्न भएको प्रतियोगितामा बेनी बोर्डिङले उपाधी जित्न सफल भएको हो । त्यसैगरी दरबाङ इङ्गलिस बोर्डिङ स्कुल द्धितिय, न्यु वेष्ट पोइन्ट आवासीय मावि तृतिय र प्रकाश माविले सान्त्वना स्थान हासिल गर्न सफल भएको मगर संघ जिल्ला समन्वय समितिका उपाध्यक्ष खम थापा मगरले जानकारी दिनुभयो । उहाँका अनुसार, प्रतियोगितामा ९ वटा विद्यालयले सहभागी जनाएका थिए ।

प्रतियोगितामा प्रथम भएको बेनी बोर्डिङले २० हजार रुपैयाँ सहित ट्रफी र प्रमाणपत्र प्रदान गरिएको थियो । द्धितिय र तृतिय हुन सफल दरबाङ इङ्गलिस बोर्डिङ स्कुल र तृतीय भएको न्यु वेष्ट पोइन्टलाई क्रमश १२ र ८ हजार रुपैयाँ सहित प्रमाणपत्र र ट्रफीले पुरस्कृत गरिएको थियो । सान्तना भएको प्रकाश माविले ५ हजार रुपैयाँ र प्रमाणपत्र हात पारेका थियो । कक्षा १२ सम्म अध्ययनरत विद्यार्थीहरुले सहभागिता जनाएका थिए । प्रतिनिधिसभा सदस्य सांसद खमबहादुर गर्बुजा र मगर संघ म्याग्दीका अध्यक्ष लोकबहादुर (लोकेश )पुन मगरले विजेता र उपविजेता विद्यालयहरुलाई पुरस्कार वितरण गर्नुभयो ।

संघिय सांसद गर्बुजाले स्थापना दिवसको शुभकामना व्यक्त गर्दै मगर समुदायको इतिहासलाई संरक्षण र प्रवद्र्धन संगै पुर्खाहरुको योगदानलाई युवा पुस्ताले समेत सम्मान गर्नुपर्नेमा जोड दिनुभयो । उहाँले मगर समुदायको भाषा ,कला, संस्कृती मगर जातीको मात्र नभई देशकै गहना भएको भन्दै यसको संरक्षण ,प्रवद्र्धन र उत्थानका लागि राज्यले विशेष ध्यान दिनुपर्ने बताउनुभयो । प्रतियोगिताले विद्यार्थीमा लुकेर रहेका प्रतिभा पहिचान सहित मगर समुदायका कला ,संस्कृतीको प्रवद्र्धनमा समेत टेवा पुग्ने बताउनुभयो ।

सांसद गर्बुजाले मगर समुदायको बाहुल्यता भएपनि राज्यको बेवास्ता र मगर समुदायले अग्रसरता नलिएकै कारण भाषा हराउँदै गएको भन्दै चिन्ता व्यक्त गर्नुभयो । मगर समुदायको भाषा पुर्नत्थान ,कला ,संस्कृतीको संरक्षण जगेर्ना संगै समग्र म्याग्दीको विकास र उन्नतीको लागि आफुले पहल गर्ने प्रतिबद्धता जनाउनुभयो ।
कार्यक्रममा गण्डकी प्रदेशसभा सदस्यद्धय हरी भण्डारी र बिमला गौचनले मगर समुदायको कला संस्कृती ऐतिहासिक र देशकै गौरव भएको बताउनुभयो । मगर संघले निर्माण गर्ने सङ्ग्रहालयलाई बजेट विनियोजनका लागि आफुहरुले प्रदेश सरकारबाट सक्दो पहल गर्ने प्रतिबद्धता जनाउनुभयो ।

त्यस्तै, जिल्ला समन्वय समिति म्याग्दीका प्रमुख राजकुमार थापा मगर , धवलागिरी गाउँपालिका अध्यक्ष प्रेमप्रसाद पुन र अन्नपुर्ण गाउँपालिका अध्यक्ष भारतकुमार पुनले मगर समुदाय सहित सबै समुदायको लोपोन्मुख भाषा ,कलासंस्कृतीको संरक्षण र प्रवद्र्धनमा स्थानीय तहले आवश्यक सहयोग गर्ने बताउनुभयो ।
कार्यक्रममा सामाजिक विकास कार्यालय म्याग्दीका प्रमुख रमेश थापा ,जिल्ला शिक्ष विकास तथा समन्वय इकाई प्रमुख दलबहादुर थापा मगर,खधवलागिरी गाउँपालिका–३,का वडा अध्यक्ष देविन्द्र रोका ,मंगला गाउँपालिका–४,का वडा अध्यक्ष लालबहादुर रोका ,मगर संघ म्याग्दीकी निवर्तमान अध्यक्ष डकमाया पाइजाले कार्यक्रमले विद्यार्थीमा लुकेर रहेको प्रतिभालाई उजागर गर्नुका साथै कला संस्कृतीको प्रवद्र्धनमा टेवा पुर्‍याउने विश्वास व्यक्त गर्नुभयो ।

मगर संघ जिल्ला समन्वय समिति म्याग्दीका अध्यक्ष पुन मगरले मगर समुदायको साझा संस्था मगर संघको स्थापना दिवसको अवसरमा विद्यार्थीको प्रतिभा पहिचान र कला संस्कृतीको प्रवद्र्धन गर्ने उद्धेश्यले प्रतियोगिता सञ्चालन गरिएको बताउँदै कार्यक्रमलाई सफल बनाउन सहयोग गर्ने सबैलाई धन्यवाद व्यक्त गर्नुभयो । मगर संघ म्याग्दीका सचिव हिराबहादुर पुन र मगर विद्यार्थी संघका केन्द्रिय सदस्य समिर रोका मगरले सञ्चालन गर्नुभएको कार्यक्रममा उपाध्यक्ष खम थापा मगरले स्वागत मन्तव्य राख्नुभएको थियो । कार्यक्रममा विभिन्न व्यक्तीहरुलाई सम्मान गरिएको थियो भने क्यान्सर पीडित दुर्गा शेरपुञ्जाको उपाचारको लागि संकलित रकम हस्तान्तरण गरिएको थियो । सोही कार्यक्रममा सांसद गर्बुजाले किरन पुनको ‘हिमाली गाउँ’ गितको भिडिओ लोकार्पण गर्नुभयो । कार्यक्रमको उद्घाटन पुर्वसन्ध्यामा र्‍यालीले बजार परिक्रममा गरिएको थियो ।