धवलागिरिमा एमालेको ‘मिसन ग्रासरुट’ अभियान

 

म्याग्दी, १४ फागुन । नेपाल कम्युनिष्ट पार्टी (एमाले) धवलागिरि गाउँपालिका कमिटीको आयोजनामा आज (आइतबार) ताकममा ‘मिसन ग्रासरुट’ अभियानसम्बन्धी कार्यक्रम सम्पन्न भएको छ । नेकपा एमालेको दुइ ग्रासरुट अभियान अन्तरगत पार्टी सुदृढीकरण एवं सङ्गठन विस्तार अभियान गरेको हो ।

कार्यक्रमलाई सम्बोधन गर्दै नेकपा एमालेका केन्द्रीय सदस्य चन्द्रमोहन गौचनले एमाले पार्टीको चुनौतीको रुपमा रहेको दक्षिणपन्थी अवसरवाद र साङ्गठनिक अराजकताको अन्त्यका लागि मिसन ग्रासरुट अभियान सञ्चालन गरिएको जानकारी दिनुभयो । पूर्व सांसद समेत रहनुभएका एमाले केन्द्रीय सदस्य गौचनले मिसन ग्रासरुट अभियानको माध्यमबाट नेता, कार्यकर्तालाई पार्टी र विभिन्न विषयहरुको बारेमा तल्लो तहसम्म पुगेर प्रशिक्षण दिएर प्रतिबद्ध बनाइने बताउनुभयो ।

सोही कार्यक्रममा एमाले गण्डकी प्रदेश कमिटीका सचिवालय सदस्य हरिकृष्ण श्रेष्ठ, प्रदेश सचिवालय सदस्य खुमबहादुर बानियाँ, पार्टी जिल्ला उपसचिव थमसरा पुन र सचिवालय सदस्य एवं प्रदेश (ख) समन्वय कमिटी संयोजक खरमाया बिटालुको विशेष उपस्थिति रहेको थियो ।

एमाले धवलागिरि गाउँपालिका कमिटीका कार्यवाहक अध्यक्ष रेशम छन्त्यालको अध्यक्षता र ताकमको वडा कमिटी सचिव तेजेन्द्रबहादुर थापाको सञ्चालनमा सम्पन्न कार्यक्रममा पालिका कमिटी उपाध्यक्ष राजाराम सुवेदीले स्वागत गर्नुभएको थियो । उक्त वैठकद्वारा दुई महिनाको अवधिमा पालिकाभित्र वडा र टोलमा पुगेर पार्टीको सङ्गठन सुदृढीकरण तथा विस्तारसम्बन्धी विषयमा आवश्यक कार्ययोजना निर्माण गरिएको छ । कार्यक्रममा पालिका कमिटीका पदाधिकारी, सदस्य, वडा कमिटी अध्यक्षहरु र अगुवा नेता तथा कार्यकताले सहभागिता जनाएका थिए ।