पहिरोमा ज्यान गुमाएकाहरुको आफन्तलाई मालिका गाउँपालिकाको आर्थिक सहयोग

म्याग्दी ३० साउन । म्याग्दीको मालिका गाउँपालिका–२ का पहिरो पीडितलाई मालिका गाउँपालिकाले सहयोग गरेको छ । गत साउन १७ गते पहिरामा पुरिएर मालिका–२ रुमको गाल्दामा घामबहादुर विकको परिवारका पाँच जनाको निधन भएको थियो । पहिरोमा ज्यान पुगमाएका पाँचै जनाको १३ औँ दिनको पुण्यतिथि पारेर घामबहादुरको परिवारको किरिया बसेका आफन्तलाई किरियाखर्चबापत आइतबार रु एक लाख २५ हजार उपलब्ध गराएको वडा अध्यक्ष उदयबहादुर बुढाथोकीले जानकारी दिनुभयो ।

वडा कार्यालयले आयोजना गरेको शोकसभामा गाउँपालिकाका अध्यक्ष बेगप्रसाद गर्बुजा, वडाध्यक्ष बुढाथोकीलगायतले रकम हस्तान्तरण गर्नुभएको थियो । गाउँपालिकाको कार्यपालिका बैठकको निर्णय बमोजिम पहिरोमा ज्यान गुमाएकाहरुको आफन्तलाई किरिया खर्च रकम सहयोग गरिएको हो । पहिरामा घामबहादुर, उनकी श्रीमती राममाया, छोरी रोजी, छोरा राजन र नवीनको मृत्यु भएको थियो । पहिराले हुत्ताएर घाइते भएका गोठे र उनकी श्रीमती गोरी विक पोखरामा उपचारपछि अस्पतालबाट ‘डिस्चार्ज’ हुनुभएको छ ।

पहिराका कारण मालिकाको २ नम्बर वडामा ११ घरपरिवार विस्थापित भएको वडाध्यक्ष बुढाथोकीले बताउनुभयो । आइतबार २ नम्बर वडाको सार्वजनिक निकायमा सार्वजनिक बिदा दिइएको थियो । गाउँपालिका अध्यक्ष गर्बुजा, उपाध्यक्ष लक्ष्मीदेवी घर्ती पुन, इलाका प्रहरी कार्यालय दरवाङका प्रमुख सागर पन्त, मालिका ४ का वडाध्यक्ष भीजेन्द्रमान पुन, प्राविधिक विमलमान राई, विकास गुरुङ, स्वकीय सचिव विनोद बुढाथोकीको टोलीले चिउरीबोट, ओखरबोटलगायत पहिराले क्षति पु¥याएको र जोखिम बनाएको ठाउँको अनुगमन समेत गरेको छ । वडा नम्बर ४ मा छ घर पहिरोबाट विस्थापित भएका छन् ।