मालिका गाउँपालिकामा आईतबार पनि विद्यालय खोल्ने निर्णय

म्याग्दी, १६ जेठ । मालिका गाउँपालिकामा आईतबार पनि विद्यालयको नियमित पठनपाठन गराउने निर्णय गरेको छ । नेपाल सरकारले हप्ताको दुई दिन सार्वजनिक विदा दिने निर्णय गरेपनि मालिका गाउँ कार्यपालिकाको बैठकले गाउँपालिका भित्र रहेको सामुदायिक तथा संस्थागत विद्यालय साविक रुपमा आईतबारदेखि शुक्रबारसम्म नियमित पठपाठन गराउने निर्णय गरेको हो ।

मालिका गाउँ कार्यपालिकाको शनिबार बसेको बैठकको निर्णयअनुसार गाउँपालिकाभित्रका सबै विद्यालय आईतबारपनि नियमित पठनपाठन गराउने निर्णय कार्यान्वयन गर्न गाउँपालिकाका शिक्षा अधिकृत अशोक रिजालले विद्यालयलाई आग्रह गर्नुभएको छ ।

विद्यालयको शैक्षिक क्षति न्यूनिकरण गराउन, विद्यार्थीहरुको नियमित पठनपाठन र प्रशासनिक कामकाजलाई नियमित संचालन गराउन आईतबार विद्यालय खोल्ने निर्णय कार्यपालिका बैठकले गरेको विज्ञप्तीमा उल्लेख छ ।

म्याग्दीमा बेनी नगरपालिकाले पनि आईतबार नियमित पठनपाठन गराउने निर्णय गरेको छ ।