रघुगंगागाउँपालिकाको अध्यक्ष र उपाध्यक्षमा नेपाली काँग्रेस विजयी

  • २ जेष्ठ २०७९, सोमबार
  • 960 पटक पढिएको

म्याग्दी, २ जेठ । म्याग्दीको रघुगंगा गाउँपालिकाको अध्यक्ष र उपाध्यक्षमा नेपाली काँग्रेसका उमेद्वार विजयी भएका छन् । काँग्रेसका भवबहादुर भण्डारीले ४ हजार ३८ मत ल्याएर गाउँपालिका अध्यक्ष र उपाध्यक्षमा काँग्रेसकै प्रेमकुमारी पुनले तीन हजार ३६४ मत ल्याएर निर्वाचित हुनुभएको सहायक निर्वाचन अधिकृत अमृत सुवेदीले जानकारी दिनुभयो ।


भण्डारी दोस्रो कार्यकालका लागि गाउँपालिका अध्यक्षमा निर्वाचित हुनुभएको हो । अध्यक्षमा एमालेका प्रेमबहादुर कार्कीले ३ हजार २७९, नेकपा माओवादी केन्द्रकी मिना बिकले ९९५, उपाध्यक्षमा एमालेकी यामकुमारी गर्बुजाले तीन हजार २४५ र माओवादी केन्द्रका रिमबहादुर कटुवालले एक हजार ७८३ मत प्राप्त गर्नुभएको थियो ।

आठ वटा वडा रहेको रघुगंगाको पाँच वटा वडा काँग्रेस र तीन वटा वडामा एमालेका उमेद्वार प्यानल सहित विजयी भएका छन् । रघुगंगा–१ बेगमा काँग्रेसका बिलबहादुर फगामी, २ भगवतिमा एमालेका अमृत भण्डारी, ३ पिप्लेमा एमालेका खिमबहादुर शाही, ४ दग्नाममा काँग्रेसका पविन गर्बुजा, ५ झिँमा काँग्रेसका मनबहादुर शेरपुञ्जा, ६ पाखापानीमा काँग्रेसका मनकुमार शेरपुञ्जा, ७ चिमखोलामा एमालेका थकबहादुर पाइजा (रिम) र ८ कुइनेमंगलेमा काँग्रेसका गमान छन्त्याल वडा अध्यक्षमा निर्वाचित हुनुभएको छ ।

१३ हजार ९४७ जना मतदातामध्ये ९ हजार ११३ मत खसेको निर्वाचन अधिकृतको कार्यालयले जनाएको छ । म्याग्दीको ६ वटा मध्य दुई वटा स्थानीय तह र ३१ वटा वडाको मतगणना सकिएको छ । मालिका गाउँपालिकाको अध्यक्षमा एमालेका बेगप्रसाद गर्बुजा र उपाध्यक्षमा एमालेकी लक्ष्मीदेवी पुन घर्ति निर्वाचित हुनुभएको छ । मतपरिणाम सार्वजनिक भएका ३० वटा वडा मध्य एमालेले १३, काँग्रेसले १२ र माओवादीले ५ वटा वडामा जित हाँसिल गरेका छन् । अव १४ वटा वडा र चार वटा स्थानीय तहको मतपरिणाम आउन बाँकी छ ।