कालीगण्डकी बचाऔँ अभियान :’नदी सप्तक’ पोस्टर कविता शृङ्खला ~ १०

  • ११ आश्विन २०७८, सोमबार
  • 2201 पटक पढिएको

मान्छे र कालीगण्डकी
————————
© राखी गौचन
जन्म र मृत्यबीचको छोटो दुरीलाई
के कुनै एकाइ छ नाप्ने ?
तर एउटा इतिहास लेखिन सक्छ
सुखद बाचिरह्यो भने
कालीगण्डकीको निलो पानी
हाँसिरह्यौ भने शालिग्राम निस्फिक्री बगरमा
खिइँदै जानुमा र खियाउँदै लैजानुमा फरक नदेख्ने आँखाहरुबाट
पक्कै बग्दैन आँसु
बेचेर माटोको रङ
कस्तो भविष्य छोड्न खोजिरहेछौं हामी ?
क्षितिजपारिबाट हेरिरहेको नवजात घामलाई
पत्रपत्र च्यातेर आमाको गुन्युझैं
किन सेक्न खोजिरहेछौं हामी आफ्नो मात्रै देह ?
भत्काइदिएर प्रकृतिको घर…
किन आतुर छौं हामी
प्लास्टिकका फूलहरूमा सुगन्ध खोज्न ?
फाँडेर हरिया जंगलहरू
किन सजाइरहेछौं
कंक्रिटको टावरमा आर्टिफिसियल ट्रिज ?
भत्किएपछि पद्धति
कहाँ बाँकी रहला र हाम्रो अस्तित्व ।
पानी खतरनाक हुन्छ
यसले बिर्सिएपछि
बाटो तहसनहस हुन सक्छ
तहसनहस हुन सक्छ
मान्छेको अभिमान र
उग्र सभ्यता
को हो कालीगण्डकीको डिलमा बसेर
पानीमा बल्छी लगाइरहेको शासक जस्तो मान्छे ?
० ० ०
#Save Kaligandaki #kaligandaki