हावाहुरीले विद्यालय भवनको छानो उडायो

सन्तोष गौतम
बेनी ७ चैत । म्याग्दीको धवलागिरी गाउँपालिका ६ मराङ स्थित राम्चे आधारभूत विद्यालयको भवनको छानो हावाहुरीले उडाएको छ । कक्षा ५ सम्म पढाइ हुने विद्यालयको कार्यालय, एक वटा कक्षा कोठा र शौचालयको छानो बुधबार रातीको हावाहुरीले उडाएको हो ।

हावाहुरीले जस्ता पाताले छाएको छानो उडाउदाँ प्रशानिक कामकाज प्रभावित भएको प्रअ छोटेलाल ठाकुरले बताउनुभयो । ‘वार्षिक परिक्षा सकिएकाले तत्कालै पठनपाठनलाई असर गरेको त छैन,’ प्रअ ठाकुरले भन्नुभयो ‘तर प्रशासनिक काम प्रभावित भएको छ ।’

सो विद्यालयमा करिब ५० जना विद्यार्थी छन् । गाउँपालिकाको विपद् व्यवस्थापन कोष मार्फत हावाहुरीले उडाएको छानो मर्मतका लागि पहल गरिएको वडा अध्यक्ष राजाराम सुवेदीले बताउनुभयो ।