बेनी अस्पतालमा प्रदेश सरकारले एमजिडिपी डाक्टर हेमन्त बास्तोलालाई खटायो

बेनी, १३ मंसिर : प्रदेश अस्पताल बेनीमा प्रदेश सरकारले शल्यक्रिया मार्फत गरिने प्रसुति र सर्जरीको पनि सेवा दिन सक्ने एमजिडिपी डाक्टर खटाएको छ । स्वास्थ्य मन्त्रालयको सिफारिसमा मुख्यमन्त्री तथा मन्त्रिपरिषद् कार्यालयले धौलागिरी अस्पताल बागलुङमा दरबन्दी भएका नवौ तहका डा. हेमन्त बास्तोलालाई प्रदेश अस्पताल बेनीमा मंसिर १० गते खटाएको हो ।

म्याग्दीबाट निर्वाचित गण्डकी प्रदेशसभा सदस्य रेशम जुग्जालीले एमजिडिपी डा. बास्तोला आइतबार प्रदेश अस्पतालमा हाँजिर हुने र उहाँ आएपछि सर्जरी तथा शल्यक्रिया मार्फत गरिने प्रसुति सेवा सूचारु हुने जानकारी दिनुभयो । “विशेषज्ञ चिकित्सक अभावमा सेवा बन्द भएको विषयमा स्वास्थ्यमन्त्री र मुख्यमन्त्रीलाई जानकारी गराएर डा. खटाउन ताकेता गरेका थियौ,” उहाँले शनिबार साँझ भन्नुभयो “स्वास्थ्यमन्त्री कृष्ण पाठकले डा. बास्तोलालाई बागलुङबाट बेनीमा पठाएको र आइतबारदेखि हाँजिर हुने आज जानकारी गराउनुभएको छ ।”

५० शैया क्षमताको अस्पतालमा सर्जरी विशेषज्ञ चिकित्सक नहुँदा मंसिर १ गतेदेखि ‘हाइड्रोशिल’, ‘एपेण्डिस’ र ‘हर्निया’को शल्यक्रिया मार्फत गरिने सेवा बन्द भएको थियो । गत कात्तिक १५ गतेदेखि बन्द भएको शल्यक्रियामार्फत गरिने प्रसूति सेवा बन्द भएको थियो । सर्जरी र शल्यक्रिया मार्फत गरिने प्रसुति सेवाका लागि समय र रकम खर्च गरेर जिल्ला बाहिर जानुपर्ने अवस्था सिर्जना भएको थियो । बेनी अस्पतालबाट म्याग्दी, मुस्ताङ, पर्वतको जलजला, बागलुङको तमानखोला गाउँपालिकाका बासिन्दाले सेवा लिने गरेका छन् । गत भदौ महिना देखि बेनी लगायत गण्डकी प्रदेश सरकार मातहतका अस्पतालको व्यवस्थापन समिति नेतृत्व विहिन छ ।

सम्बन्धीत जिल्लाको समन्वय समितिका प्रमुख समितिको अध्यक्ष रहने कार्यबिधी खारेज भएपछि अस्पतालहरु नेतृत्वविहिन भएका हुन् । म्याग्दी १(क) बाट निर्वाचित प्रदेशसभा सदस्य हरिबहादुर भण्डारीले कात्तिक अन्तिम साता बसेको प्रदेशसभाको बैठकमा शुन्य समयमा बोल्दै प्रदेश अस्पतालहरुको विकास समिति नेतृत्व विहिन हुँदा देखिएका समस्याका विषयमा सरकारको ध्यानाकर्षण गराउनुभएको थियो । बेनी अस्पतालले अन्तरङ्ग र बहिरङ्ग सहित हाडजोर्नी, दन्त, आँखा, बच्चा उपचार कक्ष, हिंसा प्रभावितका लागि अल्पकालीन सेवा केन्द्र, डायलासिस सेवा सञ्चालन गर्दै आएको छ । मेडिसिन, दन्तरोग, मनोसामाजिक विशेषज्ञ र ११ जना मेडिकल अधिकृत कार्यरत रहेका अस्पतालका निमित्त प्रमुख डा. रामु सापकोटाले बताउनुभयो । वार्षिक ६० हजारभन्दा बढीले सेवा लिने बेनी अस्पतालको वि.स. २०७४ देखि शुरु भएको भवन निर्माण कार्यले पूर्णता नपाउनु र दरबन्दी अनुसारका चिकित्सक तथा स्वास्थ्यकर्मी नहुनु मुख्य चुनौति बनेको छ ।