बाढी र पहिरोले म्याग्दीका मुख्य सडक अवरुद्ध

म्याग्दी ३० भदौ । अविरल बर्षासंगै आएको बाढी पहिरोका कारण म्याग्दीका मुख्य सडक अवरुद्ध बनेका छन् । बेनी–दरबाङ सडक र बेनी–जोमसोम सडकको म्याग्दी खण्ड अवरुद्ध बनेका छन । बेनी नगरपालिका र मंगला गाउँपालिकाको सिमाना फापरखेतमा बाढी र पहिरोले सडक अबरुद्ध बनेको छ । बर्षाको कारण अवरुद्ध सडक खुलाउन समस्या भएको वेनपा–४ का वडा सदस्य प्रेम श्रीसले बताउनुभयो ।
त्यसैगरि बेनीदेखि मुस्ताङको घाँसासम्मका विभिन्न चार ठाउँमा गय राति पहिरो खसेर सडक अवरुद्ध भएको हो ।

बेनी नगरपालिकाको जलेश्वर, रघुगङ्गा गाउँपालिकाको बैसरी, अन्नपूर्ण गाउँपालिकाको नौनीबगर र मुस्ताङको सिमाना काभ्रेभिरमा पहिरो खसेर मुस्ताङसँग सीधा यातायात सम्पर्क विच्छेद भएको जिल्ला ट्राफिक प्रहरी कार्यालयले जनाएको छ । जिल्ला ट्राफिक प्रहरी कार्यालय म्याग्दीका प्रमुख इन्द्रबहादुर नेपालीले सडक अवरुद्ध हुँदा म्याग्दी र मुस्ताङको सीधा यातायात सम्पर्कविच्छेद भएको बताउनुभयो । स्तरोन्नतिको क्रममा रहेको बेनी–जोमसोम सडक ७६ किलोमिटर दूरीको छ ।

सडक अवरुद्ध हुँदा म्याग्दीको रघुगङ्गा, अन्नपूर्ण गाउँपालिका र मुस्ताङका बासिन्दालाई आवतजावतका साथै स्याउ र आलु निकासीको काम प्रभावित भएको छ । मुस्ताङ भ्रमण, कागबेनीमा सोह्र श्राद्धको पिण्डदान तथा मुक्तिनाथ दर्शन गर्न जाने आउने पर्यटक तथा तीर्थयात्रीलाई सास्ती भएको छ ।

बेनी–जोमसोम–कोरला सडक आयोजनाले सडक विभाग र निर्माण कम्पनीका उपकरण परिचालन गरेर सडक मर्मत गरेर खुलाउने प्रयास जारी रहेको जनाएको छ । आयोजनाका सुपरभाइजर इन्द्रसिंह शेरचनले काभ्रेभिर, बैसरी र नैनीबगरमा निरन्तर पहिलो खसेकाले मर्मतमा समस्या भएको बताउनुभयो । बैसरीमा बुधबार साँझ पहिरो पन्छाएर खोलिएको सडक पुनः अवरुद्ध भएको छ । बर्षाको कारण अधिकाँश ग्रामीण सडकहरु समेत अवरुद्ध बनेका छन् ।