कालीगण्डकी बचाऔँ अभियान : ‘नदी सप्तक’ पोस्टर कविता शृङ्खला ~ १७

नदी र मानिस

—————

(एक)

मानिसलाई छुन

हृदयमा कविताहरू लिएर बगिरहे नदीहरू

नदीलाई छुन

हातमा औजार बोकेर हिँडिरह्यो आजसम्म मानिस ।

(दुई)

दोभानमा भेटिँदा

मानिसले झैं आपसमा

दुवै हात फैलाएर अंकमाल गर्छन् नदीहरू

हार्दिक हुँदैनन् नदीहरू भन्नु

ठिक लाग्दैन यसो त मलाई !

पर्खनुपर्छ दोभानमै—

अचानक भेट भएका पुराना मित्रहरू झैं

हार्दिक लाग्छन् स्नेही नदीहरू ।

(तीन)

नदीलाई पनि

झोंक चल्छ कहिलेकाहीँ ।

—मानिसको जस्तो खुनी झोंक हुँदैन तर नदीको !

आवेग र उत्तेजनामा पनि

शान्त, सरल भिक्षुजस्ता देखिन्छन् नदीहरू ।

(चार)

गीत गाउँदा नदीले

पाउजु लगाएर छमछमी नाच्छन् पहाडहरू ।

बैंसमा मात्र होइन

प्रौढ जीवनमा पनि उत्तिकै प्रिय हुन्छ नदीको स्वर

प्रेम गरी हेर्नोस् नदीलाई—

अन्त्य हुनेछ आजीवन मानिसका तिर्खाहरू !

***

-तनहूँ

…

सम्बन्धित शिर्षकहरु