कालीगण्डकी बचाऔँ अभियान :’नदी सप्तक’ पोस्टर कविता शृङ्खला ~ ४

कालीगण्डकी : चार टुक्रा

…..

(१)

ओरालो छ यात्रा जीवनको, नदीजस्तै

अविरल बहन्छ नदी पनि, दिनजस्तै

नदी उही हो, दिन उही हो, तर हैन

नयाँ लाग्छ हरेक दिन, त्यो नदीजस्तै ।

(२)

थाहै छ, के हुन्छ यदि, नदी बहुलायो भने

नदी पनि बहुलाउँछ नि, मान्छे बहुलायो भने

आफ्नै सुरमा बग्न देऊ, पवित्र गंगालाई

नदी रिसाउँछ थुन्यो भने, कतै कोट्यायो भने ।

(३)

गाईलाई पूजा गर्नेकै गाईहरू कुपोषित छन्

नदीलाई पूजा गर्नेकै नदीहरू प्रदूषित छन्

केही भएन खै ? पूजा र प्रवचनले

जहाँ रामहरू उपेक्षित छन् र रावणहरू विभूषित छन् ।

(४)

माया हो छेपाराले चाटीचाटी, दर्शन ढुंगालाई चम्काउँछ

माया हो छालले काटीकाटी, कालीले शालिग्राम बनाउँछ

चोटहरु तिखो छिनाकै भए पनि, मायैमायामा दिनाले

ढुंगो पनि मूर्ति बनेर मुस्कुराउँछ ।

० ० ०

-म्याग्दी, हाल: अमेरिका

#Save Kaligandaki

सम्बन्धित शिर्षकहरु