म्याग्दीको भकिम्लीबाट नेपाली काँग्रेसका उमेद्वार अपहरण

म्याग्दी, १८ बैशाख । म्याग्दीको बेनी नगरपालीका ३ भकिम्लीबाट नेपाली काँग्रेसको तर्फबाट स्थानीय तहको निर्वाचनका लागि वडा अध्यक्षका उमेद्वार सोमबार अपहरणमा परेका छन् । भकिम्लीबाट पार्टीको बैठकमा सहभागी हुन बेनी आउँदै गरेका नेपाली काँग्रेसबाट उमेद्बार चयन भएका जसबहादुर पुनलाई अज्ञात व्यक्तीहरुले अपहरण गरेको नेपाली काँग्रेस म्याग्दीका सदस्य केबी भण्डारीले जानकारी दिनुभयो ।

चढेर आएको गाडी बिग्रीएपछि हिडेर बेनी आउदै गर्दा दुधेखोला क्षेत्रबाट चुनाव बहिस्कार गर्ने टोलीबाट अपहरणमा परेको र मंगलवार हुने उमेद्वारी दर्ता गर्न आउन नसक्ने जानकारी गराउनुभएको थियो । दिउँसो २.३० बजेदेखि पुनको मोवाईल स्वीचअफ भएको छ ।

म्याग्दीका प्रमुख जिल्ला अधिकारी राजुप्रसाद पौडेलले अपहृत पुनको खोजीका लागि सम्भावीत ठाउँमा सुरक्षाकर्मी परिचालन गरिएको र अहिलेसम्म अवस्था पत्ता लाग्न नसकेको बताउनुभयो । अपहरणमा संलग्नको पहिचान र पुनको खोजीमा सबै सुरक्षा संयन्त्र परिचालन गरेको प्रजिअ पौडेलले बताउनुभयो ।