स्थानीय तह निर्वाचनका लागि म्याग्दीका राजनीतिक दलहरु सक्रिय

कमल खत्री
बेनी, २० फागुन । आगामी वैशाख ३० गते घोषणा भएको स्थानीय तह निर्वाचनमा आफ्नो पार्टीको पक्षमा माहोल बनाउन म्याग्दीका राजनीतिक दलहरु सक्रिय भएका छन् । जिल्लामा रहेका एक नगरपालिका र पाँच गाउँपालिका सहित ४५ वटै वडाहरुमा जनप्रतिनिधि चुन्नका लागि हुन लागेको स्थानीय तह निर्वाचनले राजनीतिक दलका नेता तथा कार्यकर्ता संगै सर्वसाधारणलाई समेत उत्साहित बनाएको छ । पहिलो पटक कार्यान्वयनमा आएको स्थानीय तहमा समयमै निर्वाचन नहुँदा जनप्रतिनिधि विहिन बन्ने जोखिम बढीरहेको सन्दर्भमा सरकारले निर्वाचन आयोगसंग समेतको सल्लाहमा निर्वाचन घोषणा गरेपछि निर्वाचनको सरगर्मी बढ्न थालेको छ । जिल्लामा रहेका मुख्य राजनीतिक दलहरु नेकपा एमाले, नेपाली काँग्रेस, नेकपा (माओवादी केन्द्र) लगायत अन्य दलहरुले निर्वाचन केन्द्रित अभियान चलाएका छन् ।

भेला, बैठक र प्रशिक्षणका कार्यक्रम लिएर दलका नेताहरु गाउँ–गाउँ पुग्न थालेपछि ग्रामिण भेगसम्म नै चुनाबी सरगर्मी बढ्ेको छ । आगामी निर्वाचनमा वडादेखि पालिका सम्मको नेतृत्वमा पुग्न आकाँक्षीहरुले आफ्नो दलभित्र समेत आफ्नो दावेदारी राख्न थालिसकेका छन भने स्वतन्त्र रुपमा उम्मेदवारहरु समेत खुल्न थालेका छन् । संघीयताको पहिलो कार्यकाल अलमलमै बितेपनि आगामी निर्वाचनमा आफ्नो दललाई बिजयी गराउन अनुरोध गर्दै जनप्रतिनिधि सहित दलका नेता तथा कार्यकर्ताहरु गाउँघरमा भोट माग्न थालिसकेका छन् । म्याग्दीमा रहेका ६ स्थानीय तहमध्ये दुई वटामा एमाले र चार वटामा काँग्रेसले नेतृत्व गरेका छन् । स्थानीय तह निर्वाचनपछि भएको प्रदेश र प्रतिनिधि सभा निर्वाचनमा बाम गठबन्धनका उम्मेदवार बिजयी भएका थिए ।

एमाले बिगतमा स्थानीय तह निर्वाचनमा गुमेको साख फकाउने योजनामा छ । काँग्रेसले आफ्नो साख जोगाउँदै पहिलो शक्तिको रुपमा स्थापित हुने प्रयत्नमा देखिन्छ भने नेकपा (माओवादी केन्द्र) एमाले र काँग्रेसकै हाराहारीमा नतिजा ल्याउने योजनामा अघि बढेको देखिन्छ । स्थायी सरकारको रुपमा रहेको स्थानीय तहको नेतृत्वका लागि जिल्ला स्थित राजनीतिक दलका पदाधिकारी तहका नेताहरु समेत इच्छुक देखिएका छन् । स्थानीय तह र वडा स्तरमा रहेका पार्टीका कमिटीहरुको बैठक राखेर निर्वाचनमा केन्द्रीत हुन निर्देशन दिएको एमाले म्याग्दीले जिल्ला कमिटीको बैठकबाट थप निर्वाचन लक्षित योजना बनाएको छ । ‘‘सबै शक्ति अब चुनाबमा केन्दित गर्छौ, पार्टी संगठन संगै विभिन्न जनबर्गिय संगठनहरु चुनाबी अभियानमा सक्रिय भएका छन्, भेला, बैठक, प्रशिक्षणका कार्यक्रमले थप व्यापकता पाउँछन’’–एमाले म्याग्दीका जिल्ला अध्यक्ष देवेन्द्रबहादुर केसीले भन्नुभयो । उहाँका अनुसार, पालिका कमिटीहरुले निर्णय गरेर टोल अभियान सञ्चालन गरेका छन् । वडा कमिटीको नेतृत्वमा सञ्चालन भएको टोल अभियानमा जिल्ला स्तरका नेताहरु समेत पुग्ने गरेका छन् ।

नेपाली काँग्रेस म्याग्दीले जिल्ला कार्यसमितिको बैठक नै राखेर औपचारिक रुपमा चुनाबी अभियान सञ्चालन नगरेको भएपनि पालिका र वडा कमिटीहरुले स्वतन्त्र रुपमा चुनाबी अभियानलाई तिब्रता दिएका छन् । अहिले वडा र पालिकामा रहेका कार्यसमितिहरु मार्फत टोल कमिटी गठन, भातृसंस्थाहरुको पुनर्गठन, र संगठन विस्तार तथा प्रशिक्षण कार्यक्रमहरु सञ्चालन भैरहेको काँग्रेस म्याग्दीका सचिब भरतबहादुर रकालले जानकारी दिनुभयो । ‘‘पार्टी सभापतिले निकट दिनमा जिल्ला कार्यसमितिको बैठक आह्वान गर्ने तयारी गर्नुभएको छ, कुनै न कुनै रुपमा अहिले नेता तथा कार्यकर्ताहरुको सक्रियता पार्टीकै गतिविधि र कार्यक्रममा छ’’–उहाँले भन्नुभयो । काँग्रेस म्याग्दीमा सम्भावित उम्मेदवारहरुको टुंगो लगाउन र प्रतिस्पर्धीहरुबिच सर्वसम्मत रुपमा उम्मेदवारको टुंगो लगाउनका लागि समेत आन्तरिक छलफल अघि बढेको छ ।

यस अघिको जनमतको आधारमा तेस्रो शक्तिको रुपमा रहेको नेकपा (माओवादी केन्द्र) म्याग्दीले यस पटकको स्थानीय तह निर्वाचनमा अन्य दुई दलकै प्रतिस्पर्धामा आफ्नो संगठनको स्थान बनाउने रणनीतिका साथ चुनाबी अभियानलाई अघि बढाएको छ । पालीका कमिटीहरुको बैठक मार्फत वडा कमिटी हुँदै टोल र सेल कमिटी गठन गर्ने र जनबर्गीय संगठनहरुको पुनर्गठन र विस्तारका कार्यक्रमलाई अघि बढाइएको माओवादी केन्द्रका जिल्ला संयोजक रेशम जुग्जाली (सुविन)ले बताउनुभयो ।‘‘स्थानीय तहको निर्वाचनका लागि सबै पालिका र वडा कमिटीहरुलाई चुनाबमा केन्द्रित हुन भनेका छाँै, सबै पालिका र वडा कमिटीहरु क्रियालिश बनेका छन, यस पटक माओवादीको सुदृढ संगठनले जिल्लामा मजबुत नतिजा ल्याउने गरि अघि बढेका छौँ–संयोजक जुग्जालीले भन्नुभयो । उहाँका अनुसार, चुनाबी प्रशिक्षण र अभियानलाई थप व्यापक बनाउने तयारी गरिएको छ । जिल्लामा माओवादीबाट निर्वाचित वडा अध्यक्षहरुले अन्य पार्टीबाट निर्वाचित जनप्रतिनिधिले भन्दा नमुना र सफल काम गरेको दावि गर्दै संघीयता माओवादीको एजेण्डा भएकाले माओवादीकै नेतृत्वले मात्रै त्यसको सफल कार्यान्वयन हुने भएकाले यस पटक आफ्नो पक्षमा जनमत बढ्ने माओवादीको दावि छ ।

एमालेबाट विभाजन भएर बनेको नेकपा (एकिकृत समाजवादी)ले समेत आफ्नो संगठनलाई जिल्लाको सबै पालिका स्तरमा विस्तार गर्ने गरि गतिविधिलाई तिब्रता दिएको छ । पार्टी संगठन निर्माण संगै जनवर्गीय संगठन निर्माण र चुनाव लक्षित भेला तथा प्रशिक्षणका गतिविधि अघि बढाइएको नेकपा (एकिकृत समाजवादी)का जिल्ला अध्यक्ष कृष्ण कुमार विश्वकर्माले बताउनुभयो । जिल्लामा एमाले, काँग्रेस, माओवादी, नेकपा (एकिकृत समाजवादी) संगै राप्रपा, मंगोल नेशनल अर्गनाइजेसन, राष्ट्रिय जनमोर्चा, जनमुक्ति पार्टी लगायतको समेत संगठन छन् । विप्लव नेतृत्वको नेपाल कम्युनिष्ट पार्टीले स्थानीय तह निर्वाचनमा भाग लिनेबारे अझै स्पष्ट पारिसकेको छैन् । मुख्य तीन पार्टीबिच एक्लाएक्लै प्रतिस्पर्धा गर्ने अवस्था आएमा साना पार्टीका मतदाता समेत कतिपय वडा र पालिकामा निर्णायक बन्ने देखिएको छ । राजनीतिक दल बाहेक स्वतन्त्र रुपमा समेत उम्मेदवारी घोषणा हुन थालेको छ । रघुगंगा गाउँपालिका–२ भगवतीका युवा सागर भण्डारीले गाउँपालिका अध्यक्ष पदमा उम्मेदवारी घोषणा गरेर आफ्ना चुनाबी एजेण्डाहरु नै अघि सारिसन्नुभएको छ भने बेनी नगरपालिका–१ रत्नेचौर घर भई हाल प्रवासमा रहनुभएका युवा निराजन थापाले समेत ‘लक्ष्य २०७९’ घोषणा गरि बेनी नगरपालिकाको मेयरमा उठ्ने घोषणा गर्नुभएको छ ।
म्याग्दीमा मतदाता नामावली अद्याावधिक गरिँदै
स्थानीय तह निर्वाचनलाई लक्षित गरि म्याग्दीमा मतदाता नामावली अद्यावधिक सुरु भएको छ । निर्वाचनका लागि अन्तिम मतदाता नामावली तयार गर्नका लागि जिल्ला निर्वाचन कार्यालयले मतदाता नामावली अद्यावधिक एवम् दावी विरोधको लागि कार्यक्रम सञ्चालन गरेको छ । मतदाता नामावलीमा रहको त्रुटि सच्याउने र वास्तविक मतदाताहरुको पहिचानका लागि अद्यावधिक अभियान सञ्चालन गरिएको जिल्ला निर्वाचन अधिकारी भिमप्रसाद घिमिरेले बताउनभयो ।

निर्वाचन आयोगमा तयार भएको फोटो सहितको मतदाता नामावलीमा मतदाताका नाम र विवरणमा हुनसक्ने दोहोरोपन र सबै प्रकारका त्रुटीहरु सच्याउनका लागि सबै वडा कार्यालयहरुमा नामावलीको विवरण टाँस गरिएको जनाइएको छ । ंफागुन २० गतेदेखि २५ गतेसम्म अभियानकै रुपमा कार्यतालिका बनाएर मतदाता नमावली प्रकाशन, दावी विरोध सहितको अद्यावधिक गर्न लागिएको कार्यालयले जनाएको छ ।म्याग्दीमा अहलिे ७८ हजार ३१८ जनाको मतदाता नामावलीको विवरण संकलन भएको छ । अद्यावधिक अभियानका क्रममा मृत्यु भएका, दोहोरोपन भएकाहरको हटाउने र नाम, थर , उमेर लगायतका विवरणमा त्रुटी भएमा सच्याउन सकिने कार्यालयका सूचना अधिकारी चित्रनाथ शर्माले जानकारी दिनुभयो ।