पाखापानीमा निःशुल्क आयुर्वेद स्वास्थ्य शिविर

म्याग्दी, ११ मंसिर। म्याग्दीको रघुगंगा गाउँपालिका-६ स्थित पाखापानीमा शनिबार आयोजित एक दिने निःशुल्क आयुर्वेद स्वास्थ्य शिविरबाट करिब २ सयभन्दा बढी लाभान्वित भएका छन् । गाउँपालिकाको आयोजना, जिल्ला आयुर्वेद स्वास्थ्य केन्द्र म्याग्दीको प्राविधिक सहयोगमा आयोजित शिविरमा पाखापानी तथा आसपासका क्षेत्रबाट १ सय ५ पुरुष, १ सय २० महिला गरी २ सय २५ जनाले सेवा लिएको प्रमुख प्रशासकीय अधिकृत अमृत सुबेदीले जानकारी दिए ।

आयुर्वेद चिकित्सालय नरदेवी काठमाण्डौमा कार्यरत बरिष्ठ कन्सल्टेन्ट आयुर्वेद विज्ञ डा.बुद्धि प्रसाद पौडेलको नेतृत्वमा भएको शिविरमा उच्च रक्तचाप, मधुमेह, हाडजोर्नीका बिरामीलाई स्वास्थ्य परीक्षण गर्नुका साथै औषधि वितरण र पञ्चकर्म विधिबाट उपचारसमेत गरेको थियो । आयूर्वेदिक औषधीका बारेमा जानकारी अभाव हुदाँ सामान्य रोगलाई समेत पालेर बस्नुपर्ने बाध्यताको अन्त्य गदैं आयूर्वेद औषधीको प्रयोग तथा विधिका बारेमा समेत विरामीलाई जानकारी गराइएको थियो ।

शिविरको गाउँपालिका उपाध्यक्ष कमला तिलिजाले जनताको घरदैलोमै पुगेर स्वास्थ्य सेवा प्रदान गर्ने प्रतिबद्धता अनुसार शिविरको आयोजना गरिएको बताईन् । गाउँपालिकाले आगामी दिनमा समेत शिविरलाई निरन्तरता दिने प्रतिबद्धता जनाएको छ । शिविरमा जिल्ला आयुर्वेद स्वास्थ्य केन्द्र बेनीमा कार्यरत डा सन्देश अधिकारी र कविराज निरीक्षक दामोदर शर्मा, महेन्द्र राखु आयुर्वेद औषधालयका कविराज निरिक्षक लक्ष्मण शर्मा चालिसे, वैद्य निरिक्षक प्रेम प्रसाद गौतम, वैद्य विनोद कुमार यादवले चेकजाँच गरेका थिए ।