बेनीमा खुला तिज गीत प्रतियोगिता, गितबाटै महिला अधिकार र कर्तव्यका कुरा ( तस्बिर र भिडियो सहित)

म्याग्दी १६ भदौ । म्याग्दी सदरमुकाम बेनीमा आयोजित अन्तर आमा समुह स्तरीय खुल्ला तिज गीत प्रतियोगितामा नवज्योति आमा समुह मंगला–५ अर्मन बिजयी भएका छन् । हरितालिका तिजको अवसरमा बेनी नगरपाकिलाको आर्थिक सहयोगमा धौलागिरि नाट्य समुहले आयोजना गरेको प्रतियोगितामा विभिन्न १६ टिमलाई पछि पार्दै अर्मनको नवज्योति आमा समुहबाट सहभागी टोली प्रथम हुन सफल भएका हुन् ।

प्रतियोगितामा रघुंगा गाउँपालिका–१ बेगको बणिबराह आमा समुह द्धितिय,मंगला गाउँपालिका–२ सल्यानका महारानी आमा समुह तृतिय र बेनी नगरपालिका–५ को चिप्लेटी आमा समुह सान्त्वना हुन सफल भएका छन् । प्रतियोगितामा प्रथम, द्धितिय, तृतिय र सान्त्वना हुन सफल समुहलाई क्रमशः नगद रु १२ हजार, ८ हजार, ५ हजार र ३ हजारको साथमा प्रमाणपत्रद्धारा पुरस्कृत गरिएको थियो ।

कार्यक्रममा बेनी नगरपालिकाका उपमेयर सञ्जु बरुवाल, अन्तरपाटी महिला सञ्जालका अध्यक्ष मुना बानियाँ, नगरपालिका स्तरीय वडा स्तरीय महिला सञ्जालका अध्यक्ष भावना पौडेल लगायतले कलाकारहरुलाई पुरस्कृत गर्नुभएको थियो । कार्यक्रमका संयोजक नारायण पौडेलको अध्यक्षता, धौलागिरी नाट्या समुहका सचिब अमित विश्वकर्माको सञ्चालनमा सम्पन्न भएको कार्यक्रममा बोल्दै उपमेयर बरुवालले तिलको मौलिकतालाई संरक्षण र संवद्र्धन गर्न आबश्यक रहेको भन्दै प्रतियोगिताले महिलाहरुको क्षमतालाई उजागर गर्न सहयोग पुग्ने बताउनुभयो ।

कार्यक्रममा अन्तरपाटी महिला सञ्जालका अध्यक्ष मुना बानियाँ, बेनी नगरपालिका–६ का वडा अध्यक्ष कृष्णसिंह बानियाँ, वडा स्तरीय महिला सञ्जालका अध्यक्ष भावना पौडेल, महिला मानव अधिकार रक्षक सञ्जालका अध्यक्ष रेखाकौशल रेग्मी लगायतले मन्तव्य राख्नुभएको थियो ।