घारमा खानेपानीका मुहानको अवस्था अध्ययन

घार १९ चैत । अन्नपूर्ण गाउँपालीका ६ घारमा रहेका खानेपानीको मुहानहरुको अवस्था अध्ययन गरिएको छ । निर्माणाधिन घारखोला जलविद्युत आयोजना प्रभावीत क्षेत्रमा रहेका खानेपानीका मुहानहरुको आईतबार आयोजनाका प्राबिधिक, जनप्रतिनिधी र सरोकार समितिका प्रतिनिधिहरुले स्थलगत अध्ययन गरेका हुन् ।

घारमा खानेपानी आपुर्ती गरिदै आएका छ वटा मुहानमा पानीको स्रोतको अवस्था अध्ययन गरीएको वडा अध्यक्ष कृष्णप्रसाद बरुवालले बताउनुभयो । जलविद्युत आयोजनाको सुरुङ खन्ने क्रममा प्रभावीत क्षेत्रमा रहेका पानीका मुहानमा पर्ने सम्भावीत असर, असर न्युनीकरणका उपाय र खानेपानी आपुर्तीको विकल्पको लागि योजना बनाउन अध्ययन गरिएको बरुवालले बताउनुभयो ।

घारमा खानेपानी आपुर्ती हुने गाडापानी, दगुर्नीपानी, मुलपानी, चिसापधेरा, प्रगेनीपानी र आलको मुहानको अध्ययन अनुगमन गरिएको थियो । अनुगमनका क्रममा मुहानहरुमा हाल पानीको स्रोतको मात्रा र अवस्थाको तथ्याङ्क संकलन गरिएको छ ।

म्याग्दी हाईड्रोपावर लिमीटेडले १४ मेगावाट क्षमत्ताको घारखोला जलविद्युत आयोजनाको शिख र घारको सिमानामा पर्ने कुरीलाबगरमा बाँध बनाएर पोखरेबगरमा बनाइने विद्युगृहसम्म पानी ल्याउन सुरुङ निर्माणको तयारी गरेको छ ।