परिवार नियोजन सुदृद्धीकरण कार्यक्रम म्याग्दीका सबै स्वास्थ्य संस्थामा

  • ८ फाल्गुन २०७४, मंगलवार
  • 406 पटक पढिएको

म्याग्दी, ८ फागुन । जिल्लाका सबै स्वास्थ्य संस्थामा परिवार नियोजन सेवा सुदृढीकरण कार्यक्रम विस्तार गरिने भएको छ ।परिवार नियोजनको अस्थाई र स्थाई साधनको प्रयोगको दर वृद्धी गरी अनईच्छुक गर्भधारण कम गरी गर्भपतन गर्नुपर्ने अवस्था आउन नदिनका लागि कार्यक्रम विस्तार गर्न लागिएको हो । युएसआईडीको आर्थिक सहयोग र जिल्ला स्वास्थ्य कार्यालयसंगको समन्वयमा सन २०१७ देखि सञ्चालीत कार्यक्रम हाल म्याग्दीका ३० वटा स्वास्थ्य संस्थामा लागु भएको छ ।

यो वर्ष ४१ वटै स्वास्थ्य संस्थामा कार्यक्रम लागु गरिने कार्यक्रमका जिल्ला संयोजक मिलन सिग्देलले सोमबार बेनीमा आयोजित कार्यक्रममा जानकारी दिए । कार्यक्रम मार्फत स्वास्थ्य कर्मीहरुलाई परिवार नियोजन सम्बन्धि तालीम प्रदान गरेर क्षमत्ता वृद्धी, परिवार नियोजनका लागि आवश्यक उपकरण सहयोग, परिवार नियोजन शिवीर सञ्चालन, परामर्श र जनचेतनामुलक गतिबिधि गरिने उनले बताए ।

सो कार्यक्रमका लागि यस वर्ष चालीस लाख बजेट प्राप्त भएको उनले जानकारी दिए । कार्यक्रम मार्फत गत वर्ष ३४४ जनाले आईयुसिडी र ईम्पलान्ट सेवा लिएका छन् । यसैगरी परिवार नियोजन शिवीरमा २५ वटा मिनील्याप, ५८ जनाले भ्यासेक्टोमी र २ जनाले ईम्पलान्ट सेवा लिएका थिए ।

३४ जना स्वास्थ्यकर्मीलाई क्षमत्ता विकास तालीम र ३० वटा स्वास्थ्य संस्थालाई परिवार नियोजन सेवाका लागि आवश्यक उपकरण उपलब्ध गराएको सिग्देलले बताए । म्याग्दीका ३९ प्रतिशत दम्पत्तीले मात्र परिवार नियोजनको अस्थाई र स्थाई प्रकृतीका साधनको प्रयोग गरेको तथ्याङ्क छ ।

जिल्ला अस्पतालका डाक्टर बिराट शर्माले अनिच्छुक गर्भधारणबाट बच्न, जन्मान्तर कायम गर्न र गर्भपतन गर्नुपर्ने अवस्था आउन नदिन परिवार नियोजनका साधनको प्रयोग बढाउन आवश्यक रहेको बताए । कार्यक्रमका सञ्चार अधिकृत राधाकृष्ण डुम्रेले सञ्चालन गरेकोे कार्यक्रममा नेपाल पत्रकार महासंघका अध्यक्ष तारानाथ शर्माले परिवार नियोजनका साधन प्रयोगप्रती रहेको गलत धारणालाई परिवर्तन गर्न आवश्यक रहेको बताए ।